Chetan Narake : चेतन नरके उतरले पुराच्या पाण्यात; मंत्र्यांकडे केली 'ही' मागणी

Chetan Narake News : कोल्हापूर जिल्ह्यात मागील आठवड्यापासून सुरु असलेल्या अतिवृष्टीमुळे महापूरसदृष्य स्थिती आहे. परिणामी जिल्ह्यातील अनेक मार्ग पुराच्या पाण्यामुळे बंद झाले आहेत. दळणवळण यंत्रणा कोलमडल्याने दूध वाहतुकीवरही परिणाम झाल्याने रोज सरासरी 25 हजार लिटर दूध शिल्लक राहत आहे.

सततचा पाऊस, थंड वातावरण आणि चाऱ्याचा अभाव अशा विपरीत नैसर्गिक परिस्थितीमुळे दूध उत्पादनही घटले आहे. ही परिस्थिती पाहून 'गोकुळ'चे संचालक चेतन नरके यांनी पुराच्या पाण्यात उतरून परिस्थितीची पाहणी केली. दूध उत्पादक शेतकऱ्यांशी चर्चा केल्यानंतर त्यांनी ही नैसर्गिक आपत्ती गृहीत धरुन शेतकऱ्यांना नुकसान भरपाई द्यावी अशी मागणी राज्याचे उपमुख्यमंत्री अजित पवार आणि दुग्ध आणि पशुसंवर्धन मंत्री राधाकृष्ण विखे-पाटील यांच्याकडे केली.

पंचगंगा नदी परिसरासह जिल्ह्यातील सर्वच नद्यांने पाणी पात्राबाहेर आले आहे. अनेक बंधाऱ्यासह रस्त्यावर पाणी आल्याने वाहतूक मार्ग बंद झाले आहे. दुधाची हक्काची बाजारपेठ गमावण्याची वेळ शेतकऱ्यांवर आली आहे. दळणवळण यंत्रणा कोलमडल्याने रोज सरासरी 25 हजार लिटर दूध शिल्लक राहत आहे.

या पार्श्वभूमीवर डॉ.चेतन नरके यांनी पन्हाळा तालुक्यातील काजवडे, पोर्ले, तांदुळवाडी, धामणी खोरा, साळवाडी, बाजारभोगाव आदी परिसरातील दूध उत्पादकांना भेट देवून अडचणी जाणून घेतल्या.

मागील आठ दिवसांसह पुढील महापुराच्या दिवसांची सरासरी काढून पूरबाधित क्षेत्रातील दूध उत्पादकांना नुकसान भरपाई द्यावी, असे निवेदन उपमुख्यमंत्री अजित पवार आणि मंत्री विखे-पाटील यांना ई मेल केले. तसेच फोनवरुन उपमुख्यमंत्री अजित पवार आणि मंत्री विखे-पाटील यांच्याशी संपर्क करुन शेतकऱ्यांना मदतीची मागणी केली.

राज्य सरकार दुग्ध उत्पादकांच्या पाठीशी राहील, नुकसान भरपाईबाबत सकारात्मक निर्णय घेण्याची ग्वाही दोन्ही मंत्री महोदयांनी दिल्याचे डॉ. चेतन नरके यांनी सांगितले आहे.

(Edited By Roshan More)