Bhujbal Advice to Munde : धनंजय मुंडेंना छगन भुजबळांचा सल्ला; ‘तोपर्यंत हे काम करा; गोपीनाथ मुंडेंचे स्वप्नही साकार होईल’

1. बीडमधील खूनप्रकरणानंतर राजीनामा द्यावा लागलेले धनंजय मुंडे यांनी राष्ट्रवादी काँग्रेसकडून जबाबदारी देण्याची मागणी केली.

2. प्रदेशाध्यक्ष सुनील तटकरे यांना मुंडे यांनी “आम्हाला रिकामं ठेवू नका” असे म्हणत नवी जबाबदारी सोपवावी अशी विनंती केली.

3. अन्न व नागरी पुरवठा मंत्री छगन भुजबळ यांनी मुंडेंना ओबीसी आरक्षण हक्काच्या रक्षणासाठी काम करावे, ज्यामुळे (स्व.) गोपीनाथ मुंडे यांचे स्वप्न पूर्ण होईल, असा सल्ला दिला.

Raigad, 22 September : बीड जिल्ह्यातील मस्साजोगचे सरपंच संतोष देशमुख यांच्या खूनप्रकरणी राजीनामा द्यावे लागलेले धनंजय मुंडे अस्वस्थ आहेत. त्या अस्वस्थेतूनच त्यांनी राष्ट्रवादी काँग्रेसचे प्रदेशाध्यक्ष, खासदार सुनील तटकरे यांच्याकडे आता आम्हाला मोकळं ठेवू नका, असे आवाहन केले आहे. त्यावरून विविध प्रतिक्रिया येत आहेत. पक्षाचे नेते तथा मुंडे यांचे खाते ज्यांच्याकडे आले आहे, त्या छगन भुजबळ यांनी धनंजय मुंडे यांनी आता ओबीसी आरक्षण हक्काच्या रक्षणाचे काम करावे, त्यातून (स्व.) गोपीनाथ मुंडे यांचे स्वप्न साकार होईल, असा सल्ला दिला आहे.

राष्ट्रवादी काँग्रेसचे प्रदेशाध्यक्ष सुनील तटकरे यांचा भारतभूषण पुरस्कार मिळाल्याबद्दल रायगड येथे सत्कार करण्यात आला. त्या कार्यक्रमात बोलताना माजी मंत्री धनंजय मुंडे यांनी काम देण्याची मागणी केली होती. त्यावरून छगन भुजबळ (Chhagan Bhujbal) यांनी मुंडे यांना ओबीसी आरक्षणाच्या रक्षणाच्या कामात सहभागी होण्याचे आवाहन केले आहे.

काय म्हणाले होते मुंडे?

‘सुनील तटकरे यांनी कायम आम्हाला मार्गदर्शन करत राहावं. चुकलो तर आमचा कान धरावा. नाही चुकलो तर चालतंच आहे. पण आता आम्हाला रिकामं ठेवू नका. जबाबदाऱ्या कसं...’ असे म्हणून जबाबदारी मिळावी, अशी विनंती धनंजय मुंडे (Dhananjay Munde) यांनी प्रदेशाध्यक्ष सुनील तटकरे यांच्याकडे केली होती. त्यावर आता तटकरे आणि पक्ष हे मुंडे यांच्या मागणीवर काय निर्णय घेतात, हे पाहावे लागणार आहे.

भुजबळांचा सल्ला

दरम्यान, धनंजय मुंडे यांच्या मागणीवर अन्न व नागरी पुरवठा मंत्री छगन भुजबळ यांनी एक सल्ला दिला आहे. ते म्हणाले की, धनंजय मुंडे यांनी आम्हाला रिकामं ठेवू नका, असं म्हटलं असेल तर पक्ष काय आहे ते बघेल. पण, एक काम आपल्याकडे जरूर आहे. बाकीचं उपमुख्यमंत्री अजित पवार बघतील.

(स्व.) गोपीनाथ मुंडे हे आपल्यासाठी जे काम सोडून गेलेले आहेत. ओबीसी आरक्षणाच्या हक्काचे जतन करणं, हे काम आहे, त्याच्यामध्ये धनंजय मुंडे यांनीही सहभागी झालं तर बरं आहे. त्यामुळे गोपीनाथ मुंडे यांचेही स्वप्न साकार होईल, असा सल्ला अन्न व नागरी पुरवठा मंत्री छगन भुजबळ यांनी धनंजय मुंडे यांना दिला.

1. प्र: धनंजय मुंडे यांनी कोणती मागणी केली?
   उ: पक्षात नवी जबाबदारी द्यावी, अशी त्यांनी मागणी केली.

2. प्र: त्यांनी ही मागणी कोणाकडे केली?
   उ: राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्याकडे.

3. प्र: छगन भुजबळ यांनी मुंडेंना कोणते काम सुचवले?
   उ: ओबीसी आरक्षण हक्काचे रक्षण करण्याचे काम सुचवले.

4. प्र: भुजबळांचा सल्ला का महत्त्वाचा मानला जातो?
   उ: कारण तो (स्व.) गोपीनाथ मुंडे यांच्या अपूर्ण स्वप्नाशी जोडलेला आहे.