Dhananjay Mahadik : धनंजय महाडिकांनी वाढवला महायुतीमधील गुंता; म्हणाले ‘त्या 29 जागांवरच चर्चा होईल’

1. कोल्हापूर महापालिका निवडणुकीत महाविकास आघाडी विरुद्ध महायुती असा थेट सामना होणार असून महायुतीतच जागावाटपावरून तणाव वाढला आहे.

2. भाजपने मागील वेळी जिंकलेल्या 34 जागांवर हक्क सांगितला असताना शिवसेनेचे राजेश क्षीरसागर 30 जागांचा दावा करतात, तर खासदार धनंजय महाडिक यांनी 35 जागांवर हक्क मागून आणखी 12 जागांची मागणी केली.

3. महाडिक यांनी स्पष्ट केले की मागणी स्वाभाविक आहे; अंतिम निर्णय भाजपच्या वरिष्ठ नेत्यांनी महायुतीतील इतर पक्षांसोबत चर्चा करून घ्यावा लागेल.

Kolhapur, 22 September : कोल्हापूर महानगरपालिका निवडणुकीच्या प्रक्रियेला वेग आल्यानंतर राजकीय पक्षांनी आतापासूनच मैदानात शड्डू ठोकायला सुरुवात केली आहे. महाविकास आघााडी आणि महायुती असा सामना महापालिकेच्या निवडणुकीत होण्याचे संकेत दिसत असताना महायुतीमध्ये आतापासूनच जागा वाटपावरून तणावाचे वातावरण निर्माण झाले आहे.

राज्याचे उच्च आणि तंत्र शिक्षण मंत्री चंद्रकांत पाटील यांनी कोल्हापूर महापालिकेत भाजपसाठी 34 जागांच्या पुढे जागा वाटपाची निर्णय होईल, असे स्पष्ट केले होते. त्याला प्रत्युत्तर म्हणून शिवसेनेकडून राज्य नियोजन मंडळाचे अध्यक्ष राजेश क्षीरसागर यांनी आतापासूनच तीस जागांवर दावा केला आहे. त्यावर आता राज्यसभेचे खासदार धनंजय महाडिक (Dhananjay Mahadik) यांनीही प्रतिक्रिया देत महायुतीमधील जागा वाटपाचा गुंता आणखीन वाढवला आहे.

कोल्हापूरमध्ये (Kolhapur) भाजप, शिवसेना आणि राष्ट्रवादी काँग्रेस महायुती म्हणूनच महापालिका निवडणुकांना सामोरे जाणार आहे. मागील निवडणुकीत 34 भाजप आणि ताराराणीचे उमेदवार निवडून आले होते. त्या जागा आम्ही लढवणारच आहोत.

आमच्यासोबत असणाऱ्या राष्ट्रवादीच्या 14 जागा निवडून आल्या होत्या, त्या जागांवर राष्ट्रवादीचा दावा असणार आहे. शिवसेनेच्या 4 जागा निवडून आल्या होत्या. निवडून आलेल्या सर्व जागांवर ज्या त्या पक्षांचा दावा असणारच आहे. त्या जागा जे ते पक्ष लढवणारच आहेत, असे खासदार धनंजय महाडिक यांनी सांगितले.

ज्या जागांचं वाटप होणार आहे. त्या 29 जागा काँग्रेसने जिंकल्या होत्या. त्या जागांवर महायुतीमध्ये जागा वाटपाचा निर्णय होणार आहे. या जागा वाटप होत असताना परसेंटेजनुसार जागावाटप होणे अपेक्षित आहे. राजेश क्षीरसागर जर तीस जागा मागत असतील, तर आमच्या मागील वेळी 35 जागा आहेत. मग आम्ही किती जागांवर दावा करायला पाहिजे, असा खोचक सवाल महाडिक यांनी केला

आमच्या (भारतीय जनता पक्ष) 35 जागा सोडून राहिलेल्या 29 जागांमधील आम्हाला 12 जागा आणखीन हव्या आहेत, असा खळबळजनक दावाही खासदार धनंजय महाडिक यांनी केला आहे.

भाजपमधील वरिष्ठ नेते बसून त्यावर निर्णय घेतला जाईल. मात्र, सध्याच्या घडीला कोणताही निर्णय झालेला नाही. मागणी करणे हे स्वाभाविक आहे. पण, महायुतीच्या वरिष्ठ नेत्यांमध्ये जे सूत्र ठरेल, ते इतर नेत्यांनाही मान्य करावे लागेल. भाजप 34 राष्ट्रवादी 14 जागा सोडणार नाही, हे सूत्र मान्य करावेच लागेल, असेही महाडिक म्हणाले.

1. प्र: कोल्हापूर महापालिकेत मागील निवडणुकीत भाजप किती जागा जिंकला होता?
   उ: भाजपने 34 जागा जिंकल्या होत्या.

2. प्र: शिवसेनेने किती जागांवर दावा केला आहे?
   उ: शिवसेनेने 30 जागांवर दावा केला आहे.

3. प्र: धनंजय महाडिक यांनी अतिरिक्त किती जागांची मागणी केली?
   उ: त्यांनी 35 जागांवर हक्क सांगून त्याव्यतिरिक्त 12 अतिरिक्त जागांची मागणी केली.

4. प्र: अंतिम जागावाटपाचा निर्णय कोण घेणार?
   उ: महायुतीतील वरिष्ठ नेते एकत्र बसून चर्चा करून अंतिम निर्णय घेणार आहेत.