Solapur Politic's : दक्षिण सोलापूरमधील ‘या’ सोसायटीबाबत सुभाष देशमुखांची मोठी मागणी; थेट निबंधकाला लिहिले पत्र

Solapur, 02 October : सोलापूर जिल्हा मध्यवर्ती सहकारी बॅंकेच्या निवडणुकीसाठीची प्रारुप यादी जाहीर झाली असून त्यावर एकूण ३७० हरकती नोंदविण्यात आल्या आहेत. जिल्हा बॅंकेच्या निवडणुकीत दक्षिण सोलापूर केंद्रस्थानी असून १४ सोसायट्यांच्या ठरावांवर हरकती घेण्यात आल्या आहेत. दुसरीकडे, माजी सहकार मंत्री तथा ज्येष्ठ आमदार सुभाष देशमुख यांनी भंडारकवठे (ता. दक्षिण सोलापूर) सोसायटीचा ठराव रद्द करण्याची मागणी सहाय्यक निबंधक सहकारी संस्था यांच्याकडे केली आहे, त्यामुळे बॅंकेच्या निवडणुकीत शह-कटशहाचे राजकारण रंगले आहे.

दक्षिण सोलापूर तालुक्यातील भंडारकवठे विविध कार्यकारी सेवा सहकारी सोसायटीमध्ये गोपाल सोमण्णा जंगलगी यांच्या नावाचा ठराव झाला आहे. मात्र, या ठरावाच्या प्रक्रियेवर आणि पद्धतीवर आमदार सुभाष देशमुख यांनी आक्षेप घेतला आहे.

आमदार सुभाष देशमुख यांनी सहाय्यक निबंधकाला दिलेल्या पत्रात म्हटले आहे की, दक्षिण सोलापूर तालुक्यातील भंडारकवठे येथील विविध कार्यकारी सेवा सहकारी सोसायटीमध्ये केडरने गट सचिवाची नियुक्ती करण्यात आलेली नाही. आपल्या आदेशाप्रमाणे संस्थेला सचिव नेमता येत नाही. भंडारकवठे सोसायटीने आपल्याकडे व सहाय्यक निबंधक यांच्याकडे तशी परवानगीही मागितलेली नाही.

सोलापूर जिल्हा मध्यवर्ती सहकारी बॅंकेच्या निवडणुकीसाठी प्रतिनिधी पाठविण्यासाठी बोलावण्यात आलेली संचालक मंडळाची सभा, त्यात झालेला ठराव इत्यादी सर्व प्रक्रिया अवैध आहे, असे वाटते. त्यामुळे भंडारकवठे सोसायटीत प्रतिनिधीचा झालेला ठराव रद्द करण्यात यावा. केडरने नियुक्त केलेल्या आणि केडरने सुचवलेल्या गट सचिवाच्या माध्यमातून जिल्हा बॅंकेसाठी मतदार प्रतिनिधी नियुक्तीची प्रक्रिया राबवावी, अशी मागणी आमदार देशमुख यांनी केली आहे.

दरम्यान, दक्षिण सोलापूर तालुक्यातील तब्बल १४ सोसायट्यांच्या ठरावावरही हरकती नोंदविण्यात आलेल्या आहेत. यामध्ये गावाचा रहिवासी नसणे, सोसायटीत सभासद नसणे, संबंधित गावात जमीन नसणे असे आक्षेप घेण्यात आले आहेत, त्यामुळे त्यावर सुनावणी होण्याची शक्यता आहे. त्याकडे अनेकांचे लक्ष असणार आहे.

दुग्ध संस्था मतदारसंघ चर्चेत

सोलापू्र जिल्हा मध्यवर्ती सहकारी बँकेच्या दुग्ध संस्था प्रतिनिधी मतदारसंघात सर्वाधिक हरकती आल्या आहेत. प्रारूप मतदार यादीवर दाखल झालेल्या एकूण ३७० हरकतींपैकी साधारणत: निम्म्याहून अधिक हरकती दुग्ध संस्था मतदारसंघातील मतदारांवरून आल्याने हा मतदारसंघ हरकतींच्या भोवऱ्यात सापडला आहे.

माढा तालुक्यातील ६० प्राथमिक दुग्ध सहकारी संस्था शेवटच्या टप्प्यात मतदार प्रतिनिधीच्या ठरावास पात्र ठरल्या होत्या. या संस्थांची नावे वगळावीत, अशी सांगोला तालुक्यातील तक्रार पारे येथील अजिंक्य सहकारी दूध उत्पादक संस्थेचे मल्हारी गायकवाड यांच्यासह ६० जणांनी घेतली आहे. पंढरपूर तालुक्यातील ६८ दुग्ध संस्थांनी आमची नावे प्रारूप यादीत घ्यावीत, अशी मागणी केली आहे. सांगोला आणि पंढरपूर तालुक्यातील दुग्ध संस्थांचे प्रकरण सध्या उच्च न्यायालयात सुरू आहे, त्यांनी हरकत घेत आमचीही नावे प्रारूप यादीत घेण्याची मागणी केली आहे.