Solapur Mayor : सोलापूरच्या महापौरपदासाठी आमदार देशमुखांच्या चिरंजीवाच्या नावाची शिफारस; गोरेंच्या तंबीनंतरही समर्थक नगरसेवकांची बैठक

Solapur, 25 January : सोलापूर महापालिकेत ८७ जागा जिंकून सत्तेवर आलेल्या भारतीय जनता पक्षात आता महापौरपदावरून शह कटशहाचे राजकारण रंगले आहे. पालकमंत्री जयकुमार गोरे यांनी नगरसेवकांच्या बैठकीत महापौरपदाबाबत माध्यमांसमोर व्यक्त होऊ नका, कोणीही चर्चा करू नका, अशी तंबी दिली होती. मात्र, त्या बैठकीनंतर आमदार विजयकुमार देशमुख गटाच्या नगरसेवकांची त्यांच्या कार्यालयात बैठक झाली. त्या बैठकीत आमदार देशमुखांचे पुत्र डॉ. किरण देशमुख यांच्या नावाची महापौरपदासाठी शिफारस करण्यात आल्याची माहिती पुढे आली आहे.

सोलापूर (Solapur) महापालिका निवडणुकीत भारतीय जनता पक्षाची निर्विवाद सत्ता आली आहे, त्यामुळे गटनेता, स्थायी समितीचे सभापती आणि महापौर पदाची लॉटरी कोणाला लागणार, याकडे शहरवासियांचे लक्ष लागले आहे. सोलापूर भाजपमध्ये आमदार विजयकुमार देशमुख, सुभाष देशमुख आणि देवेंद्र कोठे असे गट आहेत. या तीन गटांत सध्या महापौर, स्थायी समिती सभापती आणि गटनेता या पदांसाठी मोठी चूरस दिसून येत आहे.

पालकमंत्री जयकुमार गोरे यांनी भाजपच्या (BJP) नवनिर्वाचित नगरसेवकांची नुकतीच बैठक घेतली. या बैठकीत त्यांनी नगरसेवकांना गटनेता, स्थायी समिती सभापती, महापौर निवडीची प्रक्रिया सुरू झाली आहे. यासंदर्भात कोठेही बोलू नका, या पदांबाबत माध्यमांसमोर अजिबात व्यक्त होऊ नका, असा सल्ला दिला आहे.

पालकमंत्र्यांच्या बैठकीनंतर काही वेळातच आमदार विजयकुमार देशमुख यांच्या कार्यालयात त्यांच्या नगरसेवकांची बैठक झाली. त्या बैठकीत आमदार देशमुखांचे पुत्र डॉ. किरण देशमुख यांचे नाव महापौरपदासाठी पाठविण्यात आल्याची माहिती आहे. मात्र, अशी कोणतीही बैठक झाली नसल्याचा दावा देशमुख गटाकडून करण्यात आलेला नाही.

नगरसेविका वंदना गायकवाड यांचा वाढदिवस होता, त्याबद्दल त्यांचा सत्कार करण्यात आला. देशमुख गटाची स्वतंत्र बैठकीचे वृत्त माध्यमांमध्ये जाहीर झाल्यानंतर अशी कोणतीही बैठक झाली नसल्याचा दावा देशमुख गटाकडून करण्यात आला आहे, त्यामुळे महापौरपदासाठी सोलापूर भाजपमध्ये शह-कटशहाचे राजकारण सुरू झाले आहे.