Satara Sangli MLC: विधानपरिषदेसाठी साताऱ्यात मोठी घडामोड; उदयनराजे अन् गोरेंनी घेतली CM फडणवीसांची भेट; सुचवली वेगवेगळी नावं

Satara News: स्थानिक स्वराज्य संस्था विधान परिषदेची निवडणूक जाहीर झाल्यानंतर सातारा सांगली मतदारसंघांमध्ये हालचालींना वेग आला आहे. अशातच महायुतीचा उमेदवार कोण असणार? याकडे सर्वांचे लक्ष लागलेले आहे.

सातारा आणि सांगलीमध्ये भाजपचे प्राबल्य असल्याने भाजपकडून या मतदारसंघावर दावा केला जात आहे. मात्र, उमेदवार साताऱ्याचा असणार की सांगलीचा असणार? याबाबत कमालीची उत्सुकता लागून राहिली आहे.

अशातच उमेदवारीवरून भाजपमध्ये स्पर्धा लागल्याची चित्र आहे. सातारा सांगली मतदार संघासाठी भाजप खासदार उदयनराजे भोसले आणि मंत्री जयकुमार गोरे यांनी परस्पर मुख्यमंत्री देवेंद्र फडणवीस यांची भेट घेतली आहे. खासदार उदयनराजे भोसले यांनी आपले निकटवर्तीय सुनील काटकर तर मंत्री गोरे यांनी माजी जिल्हाध्यक्ष धैर्यशील कदम त्यांना उमेदवारी देण्याची विनंती केली आहे.

सातारा आणि सांगली मतदारसंघांमध्ये जवळपास 853 इतके मतदार आहेत. त्यापैकी सातारा जिल्ह्यातील 438 पैकी भाजपाकडे 222 सदस्य आहेत. तर सांगलीत भाजपचे अंदाजे 95 सदस्य आहेत. तुलनेत सांगली जिल्ह्यातील भाजपचे सदस्य कमी असल्याने सातारा जिल्ह्याचा हक्क असल्याचा कार्यकर्त्यांचा दावा आहे. त्यामुळे भाजपातून कोणाला उमेदवारी मिळणार याची उत्सुकता लागली आहे.

निवडणूक जाहीर झाल्यानंतर माजी सभापती सुनील काटकर आणि माजी जिल्हाध्यक्ष धैर्यशील कदम यांची नावे समोर येत आहेत. त्यांना उमेदवारी मिळावी यासाठी खासदार उदयनराजे छत्रपती आणि मंत्री जयकुमार गोरे यांनी विशेष प्रयत्न सुरू ठेवले आहेत.

दरम्यान, दोघांनीही मुख्यमंत्री देवेंद्र फडणवीस यांची भेट घेत विधान परिषदेच्या उमेदवारी बाबत चर्चा केली आहे. फडणवीस सकारात्मक असल्याचे दोन्ही गटाकडून दावा केला जात आहे.

सांगली जिल्ह्यातूनही अनेकांनी फिल्डिंग लावली आहे. यामध्ये समित कदम, सम्राट महाडिक, पृथ्वीराज देशमुख हे प्रबळ दावेदार मानले जात आहेत. याशिवाय शेखर इनादार आणि मकरंद देशपांडे यांचीही नावे चर्चेत आहेत. मागील निवडणुकीत हा मतदारसंघ काँग्रेसकडे गेला. त्यामुळे आता सातारा जिल्ह्यापुढेही उमेदवारी मिळवण्याचे आव्हान आहे.