Solapur Politic's : शरद पवारांच्या दौऱ्याकडे सोलापुरातील राष्ट्रवादीच्या दोन आमदारांची पाठ; दोघांच्या भूमिकेबाबत पुन्हा चर्चा

Solapur, 01 November : राष्ट्रवादी काँग्रेस शरदचंद्र पवार पक्षाचे राष्ट्रीय अध्यक्ष शरद पवार हे आज सोलापूरच्या दुष्काळी भागाच्या पाहणी दौऱ्यावर होते. त्यांनी आज माढा तालुक्यातील तुळशी गावात जाऊन दुष्काळी परिस्थितीची पाहणी केली. या दौऱ्याला पक्षाचे माळशिरसचे आमदार उत्तम जानकर आणि करमाळ्याचे आमदार नारायण पाटील यांनी दांडी मारली. या दोन आमदारांच्या गैरहजेरीबाबत मोठी चर्चा रंगली आहे.

ज्येष्ठ नेते शरद पवार यांनी आज माढा तालुक्यातील वरवडे येथून दुष्काळी पाहणी दौऱ्याला सुरुवात केली. वरवडे येथून पवारांनी तुळशी येथे पिकांची, पाण्याअभावी जळू लागलेल्या फळबागांची पाहणी केली. त्यानंतर माध्यमांशी संवाद साधताना पवार यांनी तुळशी गावाला थेट मदत जाहीर केली आहे.

दरम्यान, शरद पवार यांच्या दुष्काळी परिस्थितीची पाहणी दौऱ्यात माजी उपमुख्यमंत्री विजयसिंह मोहिते पाटील, खासदार धैर्यशील मोहिते पाटील, पक्षाचे मोहोळचे आमदार राजू खरे, माढ्याचे आमदार अभिजीत पाटील व इतर नेते सहभागी झाले होते. मात्र पक्षाचे जिल्ह्यातील अन्य दोन आमदारांनी मात्र पवारांच्या दौऱ्याकडे पाठ फिरवली. त्याची चर्चा जिल्ह्यात रंगली आहे.

करमाळ्याचे आमदार नारायण पाटील आणि माळशिरसचे आमदार उत्तम जानकर यांनी विधान परिषद निवडणुकीपासून पक्षाच्या भूमिकेशी विसंगम निर्णय घेतले आहेत. स्थानिक स्वराज्य संस्थांच्या विधान परिषद निवडणुकीत या दोन्ही नेत्यांनी भाजप उमेदवाराला पाठिंबा दिला होता.

तसेच, सध्या सुरू असलेल्या सोलापूर जिल्हा मध्यवर्ती बॅंकेच्या निवडणुकीतूनही पक्षीय धोरणाच्या विरोधात वागत आहे. त्या पार्श्वभूमीवर आज सोलापूरमधील शरद पवार यांच्या दौऱ्यात हे दोन्ही नेते सहभागी होणार की नाही, याची उत्सुकता होती. पण, आमदार जानकर आणि नारायण पाटील यांनी पक्षाच्या अध्यक्षांच्या दौऱ्याकडे दुर्लक्ष केल्याचे दिसून येते.

माढा तालक्यातील तुळशी गावासाठी शरद पवार यांनी 50 लाख रुपयांची मदत जाहीर केली. या रकमेचा धनादेश खासदार धैर्यशील मोहिते पाटील यांच्याकडे देण्यात आला आहे. तो धनादेश जिल्हाधिकाऱ्यांकडे देण्याची सूचना त्यांनी केली आहे.