Satara News : संपात सहभागी जिल्हा परिषदेच्या पाच हजार कर्मचाऱ्यांना नोटीस

Satara News : जुनी पेन्शन Old Pension योजना लागू करावी, या मागणीसाठी सुरु असलेल्या संपात सातारा जिल्हा परिषदेचे Satara Zilla Parishad कर्मचारीही सहभागी झाले आहेत. या प्रकरणी जिल्हा प्रशासनाकडून पाच हजार ८०७ कर्मचाऱ्यांना नोटीसा बजावल्या आहेत. कामावर हजर व्हावे, अन्यथा कारवाई केली जाईल, असे म्हटले आहे. त्यामुळे कर्मचाऱ्यांवर कारवाई होणार का, याकडे सर्वांचे लक्ष लागले आहे.

जुन्या पेन्शनसाठी शासकिय कर्मचाऱ्यांचा बेमुदत संप सुरु आहे. जुनी पेन्शन योजना लागू करावी, ही मागणी सरकारी कर्मचाऱ्यांनी अनेक वर्षांपासून सुरू ठेवली आहे. मात्र, सरकार त्याबाबत सकारात्मक निर्णय घेत नसल्याने या वेळी राज्य सरकारी कर्मचाऱ्यांनी बेमुदत संप पुकारला आहे.

या संपात सातारा जिल्हा परिषदेचे १३ हजार कर्मचारी सहभागी झाले आहेत. सध्या जिल्हा परिषदेचे कामकाज कंत्राटी कर्मचाऱ्यांकडून सुरू आहे. शासनाच्या सूचनेनुसार संपावर गेलेल्या जिल्हा परिषदेच्या पाच हजार ८०७ कर्मचाऱ्यांना जिल्हा प्रशासनाने नोटीसा बजावल्या आहेत.

या नोटीसीत प्रशासनाने म्हटले की, कर्मचाऱ्यांनी तातडीने कामावर हजर व्हावे, अन्यथा कारवाई केली जाईल, म्हटले आहे. पण, जिल्हा परिषदेच्या सर्व विभागातील कर्मचारी संपावर असल्याने अनेकांना ही नोटीस मिळाली नसल्याचे सांगितले जात आहे.