Sharad Pawar Politic's : आता खुद्द पवारसाहेबांनी सांगितले तरी राष्ट्रवादीत थांबणार नाही : निष्ठावंत सहकारी प्रचंड आक्रमक

Solapur, 17 June : अत्यंत अडचणी काळातही साथ देऊनही राष्ट्रवादी काँग्रेस शरदचंद्र पवार पक्षाच्या जिल्हाध्यक्ष पदावरून हटविल्यानंतर जिल्हा परिषदेचे माजी अध्यक्ष बळीराम साठे आक्रमक झाले आहेत. आपल्याला कटकारस्थान करून जिल्हाध्यक्षपदावरून हटविण्यात आले आहे, त्यामुळे खुद्द ज्येष्ठ नेते शरद पवारसाहेबांनी सांगितले तरी आता आपण राष्ट्रवादी काँग्रेस शरदचंद्र पवार पक्षात थांबणार नाही, असा निर्वाणीचा इशारा साठे यांनी दिला आहे. पवार साहेबांच्या निरोपानंतरही आता पक्षात थांबणार नाही, तसेच त्यांना भेटणारही नाही, असा ठाम निर्धार त्यांनी बोलून दाखवला आहे.

राष्ट्रवादी काँग्रेस शरदचंद्र पवार पक्षाच्या सोलापूर जिल्हाध्यक्षपदावरून बळीराम साठे (Baliram Sathe) यांची चार दिवसांपूर्वी उचलबांगडी करून त्या ठिकाणी मोहिते पाटील समर्थक जिल्हा परिषदेचे माजी सदस्य वसंतराव देशमुख यांची नियुक्ती करण्यात आली आहे.

जिल्हाध्यक्षपदावरून अपमानास्पद पद्धतीने हटविण्यात आल्यानंतर साठे आणि त्यांचे समर्थक आक्रमक झाले आहेत. त्यानंतर वडाळ्यात मेळावा घेऊन राष्ट्रवादी काँग्रेस शरदचंद्र पवार पक्ष (NCP) सोडण्याचा निर्णय जाहीर केला आहे, त्यातही खुद्द बळीराम साठे हे आघाडीवर आहेत.

विधानसभा निवडणुकीत मोहोळ विधानसभा मतदारसंघातून सिद्धी कदम हिला जाहीर झालेली उमेदवारी रद्द करून ती राजू खरे यांना देण्यात बळीराम साठे यांचा पुढाकार होता. मोहोळमधील एबी फॉर्म बदलल्यामुळे जयंत पाटील आणि धैर्यशील मोहिते पाटील यांनी आपल्या विरोधात कटकारस्थान करून पदावरून हटविले.

पक्षात होणाऱ्या नव्या बदलांबाबत विश्वासात घेऊन सांगितले असते, तर आपण पदाचा खुशीने राजीनामा दिला असता. मात्र, नवे बदल करताना कुठेही विश्वासात घेण्यात आलेले नाही, त्यामुळे कार्यकर्त्यांमध्ये प्रचंड नाराजी आहे

राष्ट्रवादी काँग्रेस शरदचंद्र पवार पक्षात घडणाऱ्या घडामोडी शरद पवारांना माहीत नाहीत काय, त्यांच्या मान्यतेशिवाय पक्षात असे बदल होतच नाहीत. मी त्यांच्यासोबत गेली साठ वर्षे आहे, त्यामुळे मला त्याबाबत माहिती आहे.

पवार साहेबांच्या अत्यंत अडचणीच्या काळात त्यांच्यासोबत ठामपणे उभा राहिलो, इतर नेते पक्ष सोडून जात असताना मी जिल्हाध्यक्षपदाची जबाबदारी स्वीकारली आणि ती सक्षमपणे सांभाळली. पक्षनिष्ठेचे असे फळ मिळत असेल, तर पक्षात थांबण्यात काय अर्थ आहे, त्यामुळे आता पक्ष सोडण्याचाच निर्णय घेतला आहे, असेही साठे यांनी सांगितले.

उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसमध्ये जाण्याचा कोणताही विचार अद्यापपर्यंत पुढे आलेला नाही. तसेच, शिंदेसेनेत जायचे का, याचाही निर्णय अद्याप झालेला नाही. पुढील आठ दिवसांत कोणत्या पक्षात जायचे, याचा निर्णय होईल आणि तो निर्णय कार्यकर्तेच घेतील, असेही साठे यांनी स्पष्ट केले‌.