माजी सदस्यांना हवी जिल्हा नियोजनच्या बैठकीत सहभागी होण्याची संधी

अहमदनगर - अहमदनगर जिल्हा परिषद व पंचायत समिती निवडणुकीची आचारसंहिता लागण्याच्या आतच जिल्हा नियोजन समितीची बैठक उरकण्याचा घाट घातला जात आहे. या बैठकीत आपल्यालाही सहभागी करून घ्यावे, अशी मागणी जिल्हा परिषदेच्या सदस्यांमधून केली जात आहे. ( Opportunity for former members to participate in district planning meetings )

जिल्हा परिषदेच्या सदस्यांचा कार्यकाळ 20 मार्चला संपलेला आहे. त्यामुळे जिल्हा परिषदेवर प्रशासकराज आलेले आहे. जिल्हा परिषदेप्रमाणे या सदस्यांची आता जिल्हा नियोजन समितीवरील नियुक्तीही रद्द झालेली आहे. त्यामुळे जिल्हा नियोजन समितीच्या आगामी बैठकीला जिल्हा परिषदेचे 32 सदस्य नसणार आहेत. या बैठकीला आम्हाला उपस्थित राहण्याची परवानगी द्यावी, अशी मागणी या माजी सदस्यांमधून होत आहे. ही बैठक आगामी पंधरा ते वीस दिवसांत होण्याची शक्यता आहे. जिल्हा परिषदेच्या निवडणुकीची तारीख अद्याप जाहीर झालेली नाही. मात्र, पालकमंत्री हसन मुश्रीफ यांच्या परवानगीने ही बैठक होणार आहे.

बैठकीला कमी वेळ लागणार

जिल्हा नियोजन समितीच्या बैठकीला नेहमीपेक्षा कमी वेळ लागणार आहे. प्रत्येक सभेला जिल्हा परिषदेचे सदस्य निधीसह विविध प्रश्न उपस्थित करून पालकमंत्र्यांसह सर्वाधिक निधी मिळण्यासाठी प्रयत्न करायचे. त्यामुळे सभेला जास्त वेळ लागत होता. मात्र, जिल्हा परिषदेचे सदस्य सभेला उपस्थित राहणार नसल्याने बैठकीला कमी वेळ लागणार आहे.

समितीचे संख्याबळ

जिल्हा परिषद सदस्य : 32

महानगरपालिका : 3

नगरपालिका : 4

संक्रमित नगरपालिका : एक

शासकीय नियुक्त : 14

खासदार : दोन

आमदार : 13

जिल्हा परिषदेची नवीन कार्यकारिणी अस्तित्वात येईपर्यंत जुन्यांना काम करण्याची संधी द्यावी, निवडणुका लागल्या नाहीत, हा सदस्यांचा दोष नसून सरकार व निवडणूक आयोगाचा आहे. त्यामुळे जिल्ह्याच्या विकासासाठी सदस्यांना समितीच्या बैठकीला उपस्थित राहू दिले पाहिजे.

- राजेश परजणे व जालिंदर वाकचौरे, माजी सदस्य, जिल्हा परिषद