हिंदू हा शब्द गुलामीचे प्रतीक, आताच झुगारा : लक्ष्मण माने

सातारा : खासदार शरद पवार यांनी कवी जवाहर राठोड यांच्या पाथरवट कवितेचे निरूपन जकातवाडीच्या कार्यक्रमात केले होते. या कवितेवरील वक्तव्याचा राजकीय अन्वयार्थ लावणारे हे संकुचित मनोवृत्तीचे आहेत. या मनोवृत्तीला आत्ताच विरोध झाला पाहिजे, असे जर झाले नाही तर ब्राम्हणांच्या कटकारस्थानाला बहुजन समाजाचे तरुण बळी पडतील. हिंदू हा शब्द गुलामीचे प्रतीक असून तो शब्द आपण आताच झुगारला पाहिजे, असे आवाहन पद्मश्री लक्ष्मण माने यांनी केले आहे.

शासकीय विश्रामगृहात श्री. माने यांनी पत्रकारांशी संवाद साधला. ते म्हणाले, "नऊ मे रोजी भटके-विमुक्त जाती जमाती संस्थेच्या वतीने पत्रकार निखिल वागळे यांना फुले आंबेडकर पुरस्कार देण्यात आला. या कार्यक्रमात शरद पवार यांनी जवाहर राठोड यांची पाथरवट नावाची कविता वाचून दाखवत त्यावर निरूपन केले होते. या कवितेच्या माध्यमातून पवारांनी हिंदू देवदेवतांचा अपमान केला असे वादग्रस्त टीका भाजपने केली आहे.

मुळात पवारांवर टीका करण्याचा भाजपला कोणताही अधिकार नाही. या कवितेचा कोणताही राजकीय अर्थ लावला जाऊ नये. भाजप महाराष्ट्रामध्ये तोडा आणि फोडा हे तंत्र अवलंबून येत्या निवडणुकांमध्ये सत्ता हस्तगत करण्यासाठी प्रयत्न करत आहेत. त्यामुळे त्यांचा गनिमी कावा हा बहुजन समाजाने तातडीने ओळखावा, असे आवाहन माने यांनी केले.

हिंदू हा शब्द कोणत्याही उपनिषदांत नाही त्याचा पहिल्यांदा उल्लेख 1861 च्या ब्रिटिशांनी तयार केलेल्या गॅझेटमध्ये झाला होता. ब्राह्मण हे सुद्धा भारतीय नाहीत ते वैदिक आहेत. विरोधी पक्ष नेते देवेंद्र फडणवीसांनी आपण हिंदू ब्राह्मण आहोत असे प्रमाणपत्र दाखवावे, ते दाखवू शकणार नाहीत.

पवारांच्या कवितेवरील वक्तव्याचे राजकीय अन्वयार्थ लावणारे हे संकुचित मनोवृत्तीचे आहेत. या मनोवृत्तीला आत्ताच विरोध झाला पाहिजे. असे जर झाले नाही तर ब्राम्हण लोकांच्या कटकारस्थानाला बहुजन समाजाचे तरुण बळी पडतील. हिंदू हा शब्द गुलामी से प्रतीक आहे तो शब्द आपण आत्ताच झुगारला पाहिजे, असे आवाहन त्यांनी केले.