Phaltan Doctor Death Case: फलटण डॉक्टर महिलेचा शवविच्छेदन अहवाल आला समोर; मृत्यू नेमका कशामुळं झाला यावर झालं शिक्कामोर्तब

Phaltan Doctor Death Case: फलटण डॉक्टर महिलेच्या मृत्यू प्रकरणी शवविच्छेदन अहवाल समोर आला आहे. या अहवालातून तिचा मृत्यू नेमका कशामुळं झाला हे स्पष्ट झालं आहे. दरम्यान, या डॉक्टरच्या आई-वडिलांनी मुलीची हत्या झाल्याचा आरोप केला आहे. पण डॉक्टर महिलेच्या शवविच्छेदन अहवालात नेमक्या कुठल्या गोष्टींच्या नोंदी आहेत? जाणून घेऊयात.

फलटण येथील डॉक्टर महिलेच्या मृत्यूनंतर शवविच्छेदन करण्यात आलं. याचा अहवाल आता समोर आला असून त्यानुसार, डॉक्टर महिलेचा मृत्यू हा गळफास घेतल्यानं झाल्याचं म्हटलं आहे. तसंच तिच्या शरिरावर इतरत्र कुठल्याही जखमा किंवा आघात झालेल्या खुणा नाहीत. पण आपल्या मुलीची हत्याच झाल्याचा दावा हा तिच्या आई-वडिलांनी केला आहे. त्यामुळं या मृत्यू प्रकरणातील आरोपींना फाशीची शिक्षा द्या अशी मागणी मृत डॉक्टर महिलेच्या वडिलांनी केली आहे.

दरम्यान, आरोपी प्रशांत बनकर आणि दुसरा आरोपी पीएसआय गोपाळ बदने आणि मृत डॉक्टर महिला यांच्यामध्ये काही संभाषण झालं होतं का? यासाठी मागवलेला सीडीआर देखील पोलिसांच्या हाती आला आहे. यामध्ये पोलीस उपनिरीक्षक गोपाळ बदनेसोबत तिचा संवाद झाला असल्याचं उघड झालं आहे. पण हा आरोपी बदने पोलिसांना शरण आला असला तरी त्यानं आपला फोन मात्र पोलिसांकडं जमा केलेला नाही.

त्यामुळं आता पोलिसांच्या तपासातून हळू हळू काही गोष्टी उघड होत जातील. तर दुसरीकडं याच प्रकरणाची लिंक ही माढ्याचे माजी खासदार रणजितसिंह नाईक निंबाळकर यांच्यापर्यंत पोहोचली आहे. ठाकरे सेनेच्या उपनेत्या सुषमा अंधारे यांनी याबाबत पत्रकार परिषद घेऊन या लिंकबाबत अनेक गंभीर आरोप केले आहेत. तसंच निंबाळकरांवरविरोधात यापूर्वी झालेल्या तक्रारी आणि आरोपांचाही त्यांनी जोरदार खुलासा केला आहे. त्यामुळं हे प्रकरण आता कुठे जाऊन थांबतं हे पाहणं महत्वाचं आहे.