Prithviraj Chavan: माजी मुख्यमंत्र्यांनी टोचले सत्ताधाऱ्यांचे कान; प्रीतिसंगमावर या,आत्मपरीक्षण करा..

Karad: महाराष्ट्राचे पहिले मुख्यमंत्री यशवंतराव चव्हाण यांचा आज (शनिवारी) स्मृतीदिन आहे. यानिमित्ताने राज्याचे उपमुख्यमंत्री अजित पवार यांच्यासह अनेक राजकीय नेते, मंत्री हे कराड येथील समाधी स्थळावर (प्रीतिसंगम) जाऊन त्यांच्या स्मृतीस वंदन केले. माजी मुख्यमंत्री पृथ्वीराज चव्हाण यांनी प्रीतिसंगमावर येणाऱ्या सत्ताधाऱ्यांचे कान टोचले.

"यशवंतराव चव्हाणांच्या समाधी स्थळावर सत्ताधाऱ्यांनी एक दिवस नाही तर दररोज सकाळ-संध्याकाळ येवून आत्मपरीक्षण करण्याची गरज आहे," अशा शब्दात पृथ्वीराज चव्हाणांनी शिंदे-फडणवीस-पवार यांना टोला लगावला. अजित पवार, खासदार सुप्रिया सुळे, मंत्री शंभुराज देसाई आदींनी आज यशवंतरावांच्या समाधीस्थळी जाऊन त्यांना अभिवादन केले आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

फडणवीसांनी फसवणूक केली...

"आम्ही आरक्षण दिले होते, पण आमचे आरक्षण टिकले नाही.आमची आघाडी फोडली, आमचे सरकार गेले. फडणवीसांनी दिलेलं आरक्षण ही साफ फसवणूक होती. राज्याचे अधिकार केंद्राने काढून घेतल्यानंतर फडणवीसांनी आरक्षण दिले होते," असा आरोप चव्हाणांनी केला.

सध्या मराठा आरक्षणाचा मुद्या चर्चेत आहे, यावर चव्हाण यांनी भाष्य करीत उपमुख्यमंत्री देवेंद्र फडणवीस यांच्यावर टीकास्त्र डागले. "महाराष्ट्र हे प्रगतीशील आणि पुरोगामी राज्य म्हणून देशात ओळखले जाते, ते यशवंतराव चव्हाण यांच्या आदर्श राज्यपद्धतीमुळे. सुसंस्कृत महाराष्ट्रात विरोधक आणि सत्ताधारी यांच्यात कुठेही तेढ निर्माण होऊ नये, एकमेकांचा आदर करावा आणि त्यातून समाजकारण व राजकारण कसे करायचे असते याचा आदर्श यशवंतरावांनी आमच्यासमोर घालून दिलेला आहे," अजित पवार म्हणाले.