BJP News : पुणे पदवीधरसाठी भाजपकडून दोन नावांची चर्चा : शरद लाड की मिलिंद संपगावकर? तिकीट कोणाला?

MLC Election : विधानपरिषदेचा पुणे पदवीधर मतदारसंघ महायुतीमध्ये भाजप लढणार हे जवळपास निश्चित झाले आहे. आता भाजपमध्ये उमेदवारी कोणाला मिळणार, यावरून स्पर्धा निर्माण झाली आहे. विद्यमान आमदार अरुण लाड यांचे पुत्र शरद लाड आणि भाजपचे नेते डॉ. मिलिंद संपगावकर यांच्या नावांची प्रामुख्याने चर्चा सुरू आहे.

शरद लाड की मिलिंद संपगावकर?

शरद लाड हे राष्ट्रवादी काँग्रेस शरदचंद्र पवार पक्षाचे विद्यमान आमदार अरुण लाड यांचे पुत्र आहेत. अरुण लाड गतवेळी एकसंध राष्ट्रवादी काँग्रेस निवडून आले आहेत. यंदा वडिलांच्या जागी निवडणूक लढवण्याचा निर्णय घेत शरद लाड यांनी भाजपमध्ये प्रवेश केला. पण लाड यांच्याही आधी आपण कामाला लागलो आहोत, असे म्हणत संपगावकर यांनी भाजपकडे उमेदवारीची मागणी केली आहे.

संपगावकर यांचा राष्ट्रीय स्वयंसेवक संघाशी दीर्घकाळ संबंध राहिला असून 1996 पासून ते भाजपच्या राजकारणात सक्रिय असल्याचे सांगितले जाते. पदवीधर मतदार नोंदणीच्या कामातही त्यांनी मोठी तयारी केल्याचा दावा त्यांच्या समर्थकांकडून केला जात आहे. अर्थशास्त्रातील पीएचडी, यशस्वी उद्योजक आणि संघ, भाजपमधील वरिष्ठांशी असलेले जवळचे संबंध या संपगावकर यांच्या जमेच्या बाजू आहेत. त्यामुळे भाजपसमोर आता शरद लाड की मिलिंद संपगावकर, हा प्रमुख प्रश्न असल्याचे चित्र आहे.

शरद लाड यांना संधी मिळाल्यास संपगावकर काय भूमिका घेणार?

भाजपकडून शरद लाड यांच्या नावावर शिक्कामोर्तब झाल्यास डॉ. मिलिंद संपगावकर यांची भूमिका महत्त्वाची ठरणार आहे. पक्षांतर्गत स्पर्धेत तिकीट न मिळाल्यास ते स्वतंत्रपणे निवडणूक लढवण्याची शक्यता असल्याची चर्चा आहे. मात्र, याबाबत अद्याप कोणताही अंतिम निर्णय किंवा अधिकृत घोषणा झालेली नाही. त्यामुळे भाजपकडून उमेदवार जाहीर झाल्यानंतरच या चर्चांना स्पष्ट दिशा मिळणार आहे.

चौरंगी लढत होणार?

भाजपकडून शरद लाड की मिलिंद संपगावकर, महाविकास आघाडीकडून माजी सनदी अधिकारी प्रभाकर देशमुख यांच्या कन्या हर्षदा देशमुख-जाधव आणि महायुतीतील नाराजीमुळे राष्ट्रवादीचे भैय्या माने स्वतंत्र भूमिका घेणार का, यावर पुणे पदवीधर मतदारसंघातील पुढील राजकीय समीकरणे अवलंबून राहणार आहेत. मात्र, भाजपच्या उमेदवारीचा निर्णय होण्यापूर्वीच पक्षांतर्गत स्पर्धेने निवडणुकीची उत्सुकता वाढवली आहे.