MLC Election : विधानपरिषद निवडणुकीच्या जागावाटपावरून महायुतीत सुरू असलेल्या रस्सीखेचीत अखेर पुणे विभागातील दोन महत्त्वाच्या जागांवर भाजपने बाजी मारल्याची माहिती आहे. राष्ट्रवादी काँग्रेसने दावा केलेला पुणे पदवीधर आणि शिवसेनेने दावा केलेला पुणे शिक्षक मतदारसंघ भाजपच्या वाट्याला गेल्याचे सांगितले जात आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या उपस्थितीत झालेल्या बैठकीत याबाबत निर्णय झाल्याची माहिती आहे.
निवडणूक घोषित झालेल्या पाच मतदारसंघांपैकी पुणे पदवीधर आणि पुणे शिक्षक या दोन जागांवर महायुतीतील घटक पक्षांमध्ये सर्वाधिक रस्सीखेच होती. गतवेळी पदवीधरमधून एकसंघ राष्ट्रवादीकडून अरुण लाड यांनी या जागेवरून विजय मिळवला होता. त्यामुळे हा मतदारसंघ राष्ट्रवादीकडेच राहावा यासाठी मंत्री हसन मुश्रीफ आणि इतर नेत्यांचे प्रयत्न सुरु होते. तर शिक्षक मतदारसंघासाठी शिवसेनेने ताकद लावली होती. त्यामुळे या दोन्ही जागा कोणाच्या वाट्याला जाणार, याकडे राजकीय वर्तुळाचे लक्ष लागले होते.
भाजपकडून पुणे पदवीधर मतदारसंघासाठी विद्यमान आमदार अरुण लाड यांचे पुत्र शरद लाड यांच्या नावाची चर्चा असून, त्यांची उमेदवारी जवळपास निश्चित मानली जात आहे. पुणे शिक्षक मतदारसंघासाठी भाजपकडून श्री विवेकानंद शिक्षण संस्थेचे कौस्तुभ गावडे यांचे नाव अंतिम मानले जाते. महसूल मंत्री चंद्रशेखर बावनकुळे आणि उच्च शिक्षण मंत्री चंद्रकांत पाटील यांनी गावडे यांच्यासाठी आग्रह धरल्याचे सांगितले जाते.
महायुतीत बंडखोरीची चाहूल?
पुणे पदवीधर मतदारसंघात राष्ट्रवादीकडून भैय्या माने यांनी जोरदार तयारी केली होती. पण जागा भाजपला सुटल्याने माने हे बंडखोरी करण्याच्या तयारीत आहेत. याशिवाय शिक्षक मतदारसंघात शिवसेनेकडून इच्छुक असलेल्या दोन्ही उमेदवारांनीही वेगळा विचार सुरु केल्याची माहिती आहे. या संभाव्य बंडखोरीमुळे पुणे पदवीधर आणि शिक्षक मतदारसंघात चुरशीची लढत होणार हे जवळपास निश्चित आहे.
अन्य तीन जागांवरही महायुतीत समझोता
फडणवीस, शिंदे आणि सुनेत्रा पवार यांच्या बैठकीत उर्वरित तीन मतदारसंघांबाबतही निर्णय झाल्याची माहिती आहे. त्यानुसार नागपूर पदवीधर मतदारसंघ भाजपकडे, अमरावती शिक्षक मतदारसंघ शिवसेनेकडे, तर छत्रपती संभाजीनगर पदवीधर मतदारसंघ राष्ट्रवादी काँग्रेसकडे गेल्याचे सांगितले जात आहे. उमेदवारी अर्ज दाखल करण्याची अंतिम तारीख ६ ऑक्टोबर असून मतदान २३ ऑक्टोबरला होणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.