पुणे महापालिका निवडणुकीसाठी रणनीती आणि उमेदवारांची चर्चा करण्यासाठी भाजपची कोअर कमिटी बैठक उद्या होणार आहे.
बाहेरच्या पक्षांमधून येणाऱ्या कार्यकर्त्यांना प्रवेश द्यायचा की नाही, यावरून बैठकीत वाद निर्माण होण्याची शक्यता आहे.
निवडणूक जवळ येत असल्याने भाजपमध्ये उमेदवार निवडीसंदर्भात तणाव वाढणार असल्याचे राजकीय वर्तुळात चर्चा आहे.
Pune News : पुणे महापालिकेची निवडणुकीचा कार्यक्रम पुढच्या काहीच दिवसात जाहीर होण्याची शक्यता आहे. यासाठी सर्वच राजकीय पक्षांनी मोर्चे बांधणीला वेग दिला आहे. अशातच पुणे भाजपमध्ये धुसफूस असल्याचे समोर येत असून उद्या (ता. 7) होणाऱ्या भाजपच्या कोअर कमिटीच्या बैठकीत याचा उद्रेक होण्याची शक्यता आहे. या बैठकीत बाहेरच्या पक्षातील कार्यकर्त्यांना प्रवेश देण्यावरून वाद होण्याची शक्यता वर्तवली जातेय.
पुणे महापालिकेची निवडणूक पुढील काही दिवसात जाहीर होण्याची शक्यता आहे. त्यामुळे सर्वच राजकीय पक्षांनी तयारीसाठी कंबर कसली आहे. भाजपने महापालिका निवडणुकीची तयारी यापूर्वीच सुरु केली आहे. पण प्रत्यक्ष उमेदवारी निश्चित करण्याच्या दृष्टीने प्रथमच कोअर कमिटीमध्ये चर्चा होणार आहे.
ही बैठक एका मंगल कार्यालयामध्ये आयोजित करण्यात आली असून यावेळी केंद्रीय राज्यमंत्री मुरलीधर मोहोळ, उच्च व तंत्र शिक्षण मंत्री चंद्रकांत पाटील, शहराध्यक्ष धीरज घाटे, निवडणूक प्रमुख गणेश बीडकर यासह शहरातील सर्व आमदार, खासदार, पक्ष संघटनेतील महत्त्वाचे पदाधिकारी उपस्थित राहणार आहेत.
या बैठकीत निवडणूक लढविण्याची रणनीती ठरविण्याबरोबरच भाजपतर्फे निवडणूक लढविण्यासाठी इच्छुक असलेल्या उमेदवारांसंदर्भात चर्चा करण्यासाठी आयोजित करण्यात आली आहे. यामुळेच ही बैठक महत्त्वाची मानली जात आहे. मात्र आता या बैठकीत बाहेरच्या पक्षातील कार्यकर्त्यांना प्रवेश देण्यावरून वाद होण्याची शक्यता आहे.
गेल्या काही दिवसांपासून भाजपमध्ये खडकवासला, वडगावशेरी, हडपसर, पुणे कॅन्टोन्मेंट विधानसभा मतदारसंघातील माजी नगरसेवक व अन्य पदाधिकाऱ्यांचा प्रवेश होणार अशी चर्चा सुरु होती. पण हे प्रवेश थांबविण्यात आले होते. आता कोअर कमिटीच्या बैठकीत याच प्रवेशावरून चर्चा होणार आहे. पण भाजपमध्ये बाहेरच्यांना पक्ष प्रवेश देण्यावरून मतभेद आहेत, काही आमदारांचा त्यास तीव्र विरोध आहे. त्यामुळे यावरून बैठकीत वादाची ठिणगी पडण्याची शक्यता आहे.
भाजपने महापालिका निवडणूक स्वबळावर लढविण्याची तयारी केली आहे. यामध्ये भाजपचे सर्वात सुरक्षित प्रभाग आणि ज्यांची उमेदवारी ही जवळपास निश्चित आहे अशा 42 जणांची यादी तयार केली आहे. यामध्ये कोथरूड, कसबा या दोन मतदारसंघासह सर्वच मतदारसंघातील काही उमेदवारांचा समावेश आहे. या 42 जणांची यादी अंतिम करून ती प्रदेशाकडे पाठविण्याचाही निर्णय या बैठकीत होणे अपेक्षित आहे.
पुण्यात कोअर कमिटीची बैठक होत असताना राज्यमंत्री माधुरी मिसाळ, आमदार हेमंत रासने हे दोघे नागपूर येथे अधिवेशनासाठी पोचले आहेत. अन्य आमदारही बैठक संपल्यानंतर नागपूरला जाणार आहेत. पण त्यांना विमानाचे तिकीट रद्द केल्याचे कंपनीने कळविल्याने उद्या कसे जायचे असा प्रश्न त्यांच्यापुढे निर्माण झाला आहे.
FAQs :
1. भाजपची कोअर कमिटी बैठक कधी आहे?
उद्या (ता. 7) सकाळी बैठक होणार आहे.
2. बैठकीतील मुख्य अजेंडा काय आहे?
पुणे महापालिका निवडणुकीची रणनीती आणि इच्छुक उमेदवारांवर चर्चा.
3. बैठकीत वाद का होऊ शकतो?
बाहेरच्या पक्षातील कार्यकर्त्यांना भाजपात प्रवेश द्यायचा की नाही, यावर मतभेद आहेत.
4. निवडणूक कोणत्या पातळीवर महत्त्वाची आहे?
पुणे महापालिका ही राज्यातील सर्वात महत्त्वाची शहरी स्थानिक संस्था मानली जाते.
5. उमेदवार निवड प्रक्रिया कशी होणार?
कोअर कमिटीच्या चर्चेनंतर अंतिम यादी उच्च नेतृत्वाच्या मान्यतेने जाहीर होईल.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.