रोहित पवारांनी मुख्यमंत्री शिंदेना केली विनंती : माझ्या कामाचे श्रेय तुम्ही घ्या पण ते काम करा

अहमदनगर - कर्जत ( जि. अहमदनगर ) येथे वरिष्ठ दिवाणी न्यायालय राष्ट्रवादी काँग्रेसचे आमदार रोहित पवार ( Rohit Pawar ) यांनी मंजूर करून आणले होते. मात्र शिंदे फडणवीस सरकारने आमदार रोहित पवारांना झटका देत मतदार संघात मंजूर झालेले दिवाणी न्यायालयाची मंजुरी स्थगित केली. त्यामुळे आक्रमक झालेल्या रोहित पवारांनी फेसबुक पोस्ट करत राज्य सरकारवर टीका केली. तसेच स्थगिती उठवण्यासाठी मुख्यमंत्र्यांना साकडे घातले. माझ्या कामाचे श्रेय तुम्ही घ्या पण दिवाणी न्यायालय करा अशी विनंती त्यांनी मुख्यमंत्र्यांना केली आहे. ( Rohit Pawar requested Chief Minister Shinde )

रोहित पवार यांची फेसबुक पोस्टमध्ये म्हंटले आहे की, माझ्या मतदारसंघातील पक्षकारांची 'तारीख पे तारीख' या त्रासातून सुटका व्हावी आणि वकिलांचीही सोय व्हावी म्हणून गेली दोन-अडीच वर्षे पाठपुरावा करुन महाविकास आघाडी सरकार असताना मी कर्जतला दिवाणी न्यायालय मंजूर करुन आणलं. पण या सरकारने सत्तेत येताच या निर्णयाला स्थगिती दिली, असे त्यांनी सांगितले.

त्यांनी पुढे म्हंटले आहे की, कदाचित, राज्य पातळीवरील मोठ्या निर्णयांना स्थगिती देताना तालुका पातळीवरील दिवाणी न्यायालयासारख्या छोट्या निर्णयालाही स्थगिती देण्याचा निर्णय अनावधानाने झाला असावा. त्यामुळे माझी मुख्यमंत्र्यांना विनंती आहे की, याबाबत आपण व्यक्तिशः लक्ष घालून या निर्णयावरील स्थगिती उठवावी, अशी विनंती त्यांनी केली.

केलेल्या कामाचे श्रेय घ्यायला हरकत नाही, पण न केलेल्या कामाचं श्रेय घेणारे माझ्या मतदारसंघात अनेकजण आहेत. कदाचित मी प्रयत्न करून मंजूर करून आणलेल्या दिवाणी न्यायालयाच्या बाबतीतही श्रेय घेण्यासाठी असे लोक पुढं यायला कमी करणार नाहीत, असा टोलाही त्यांनी विरोधकांचे नाव न घेता लगावला.