Satara ZP Controversy : साताऱ्याचे SP तुषार दोशी सक्तीच्या रजेवर, जिल्हा परिषद राडा प्रकरण भोवलं, सभापती निवडीपूर्वीच कारवाई!

Satara News : सातारा जिल्हा परिषद अध्यक्षपदाच्या निवडीवेली मोठा राडा झाला होता. पोलिसांकडून मंत्री शंभूराज देसाई यांना धक्काबुक्की करण्यात आली होती. देसाई यांनी या प्रकरणी विधानसभेत आवाज उठवला होता.

शिवसेनेचे मंत्री, आमदारांकडून जोशी यांच्या निलंबनाची मागणी करण्यात आली होती. आता या प्रकरणात मोठा ट्विस्ट आला असून तुषार दोशी यांना सक्तीच्या रजेवर पाठवण्यात आले आहे. चार एप्रिलला जिल्हा परिषदेच्या विविध समितींच्या अध्यक्षपदाची निवड होणार आहे. त्यापूर्वीच ही करावाई करण्यात आली आहे.

या प्रकरणाची चौकशी होईपर्यंत दोशी यांना सक्तीवर रजेवर जाण्याचे आदेश देण्यात आले आहेत. तसेच चौकशी होईपर्यंत अतिरिक्त पोलिस अधीक्षक वैशाली कडुकर यांच्याकडे सातारा पोलीस अधीक्षक पदाची जबाबदारी असणार आहे.

सातारा जिल्हा परिषद अध्यक्षपदाच्या निवडणुकी भाजपने राष्ट्रवादी आणि शिवसेनेच्या पाच सदस्यांना फोडले होते. तसेच राष्ट्रवादीचे जिल्हा परिषद सदस्य अनिल देसाई, संदीप मांडवे यांना पोलिसांनी मतदान करू न देता अटक केली होती.

तसेच या वेळी पोलिसांना अडवणाऱ्या मंत्री शंभूराज देसाई यांना धक्काबुक्की करण्यात आली होती. भाजपच्या फायद्यासाठी पोलिसांनी हे काम केल्याचा आरोप देसाई यांनी करत पोलिस भाजपचे घरगडी असल्यासारखे वागले, अशी टीका देसाई यांनी केली होती. तसेच ‘तो एसपी घरगड्यासारखा वागलाय, त्याला तत्काळ निलंबित करा, सेवेतून त्याला बडतर्फ करा', अशी मागणी विधानसभेत केली होती.