Satara ZP controversy : पत्नी झेडपी अध्यक्ष होताच महेश शिदेंचा कॉन्फिडन्स वाढला, थेट मंत्री शंभुराज देसाईंना घेतलं अंगावर

Satara News, 23 Mar : सातारा जिल्हा परिषद अध्यक्ष आणि उपाध्यक्ष पदाच्या निवडणुकीत भाजपने भाजपच्या प्रिया शिंदे यांची अध्यक्षपदी तर भाजपचे राजू भोसले यांची उपाध्यक्षपदी निवड झाली. मात्र, या निवडणुकी दरम्यान मोठा राडा झाला होता.

या राड्यामध्ये सातारा जिल्ह्याचे पालकमंत्री शंभूराज देसाई यांच्या हाताला जखम झाली होती. या सर्व प्रकरणाचे पडसाद आज राज्याच्या विधान परिषदेत उमटले. विधान परिषदेत पोलिसांच्या अरेरावीचा मुद्दा उपस्थित करत मंत्री शंभूराज देसाई यांनी थेट पोलीस अधीक्षक तुषार दोशी यांच्यासह इतर शंभर पोलिसांचं निलंबन करावं अशी मागणी देसाई यांनी केली.

त्यांच्या मागणीला सकारात्मक प्रतिसाद देत उपसभापती नीलम गोऱ्हे यांनी एसपी तुषार दोशी यांच्यासह इतर १०० पोलिसांच्या निलंबनाचे आदेश दिले. त्यामुळे या प्रकरणात हस्तक्षेप करणं पोलिसांना भोवल्याचं दिसत आहे. मात्र, आता अशातच शिंदेंच्या शिवसेनेचे आमदार आणि नवनिर्वाचित जिल्हा परिषद अध्यक्षा प्रिया शिंदे यांचे पती महेश शिंदे यांनी पोलिसांची बाजू घेत थेट शंभूराज देसाईंना सुनावलं आहे.

या सर्व प्रकरणावर बोलताना आमदार महेश शिंदे म्हणाले, पोलिसांना विनाकारण यामध्ये घुसवणं चुकीचं आहे. अजूनही सर्वांनी अभ्यास केला पाहिजे आणि फक्त दोन सदस्य माझे आहेत. पालकमंत्र्यांनी एवढा दंगा करायची काय गरज आहे? असा सवाल त्यांनी उपस्थित केला.

तर अजितदादांचे पाच सदस्य फुटले त्याचं बघाना, असं म्हणत महेश शिंदे यांनी या सर्व प्रकरणाची माहिती मी एकनाथ शिंदेना दिली होती आणि असं होणार हे त्यांना सांगितल्याचा दावा केला आहे. शिवाय सदस्यांना शरद पवारांच्या गटासोबत जाणं पटलेलं नाही, असा दावाही महेश शिंदेंनी केला.

त्यामुळे एकीकडे शंभूराज देसाई पोलिसांविरोधात आणि भाजपविरोधात आक्रमपणे खिंड लढवत असतानाच त्यांच्याच पक्षाचे आमदार पोलिसांचं समर्थन करताना दिसत आहेत. त्यामुळे आता पक्ष प्रमुख एकनाथ शिंदे नेमकी काय भूमिका घेणार याकडे सर्वांचं लक्ष लागलं आहे.