Satej Patil : 'आबिटकर, मुश्रीफांची नाराजी असेल तर हतबलता...', सतेज पाटलांनी कळीचा मुद्दा काढला!

Satej Patil Politics : मंत्रिमंडळाच्या नुकताच्य झालेल्या बैठकीत शक्तिपीठ महामार्गाला राज्य मंत्रिमंडळाने मंजुरी दिली आहे. शक्तिपिठ महामार्गाला कोल्हापूर जिल्ह्यातून सर्वाधिक विरोध आहे. विधानसभा निवडणुकीपूर्वी शेतकरी या मार्गाच्या विरोधात रस्त्यावर उतरले होते. त्यावेळी शेतकऱ्यांचा विरोध असेल तर महामार्ग करणार नसल्याचे महायुती सरकारने सांगितले होते. मात्र, हा महामार्गाला मंजुरी दिल्याने काँग्रेस नेते सतेज पाटील यांनी सरकारवर निशाणा साधला आहे.

निवडणुकीपूर्वी शक्तिपीठ महामार्ग रद्द करण्याची भूमिका तत्कालीन मुख्यमंत्र्यांनी घेतली होती.मात्र ही घोषणा केवळ मतासाठी होती का? असा सवाल उपस्थित होत आहे. गरज नसलेला महामार्ग, शेतकऱ्यांच्या माथी लागू नका. सरकारला विनंती आहे. जर पालकमंत्री प्रकाश आबिटकर आणि मंत्री मुश्रीफ यांची नाराजी असेल तर राज्याच्या प्रकल्पावर दोन्ही पक्षांची हतबलता आहे. हे यावरून स्पष्ट होते, असे सतेज पाटील म्हणाले.

अनेक मंत्री एकमेकांच्या विरोध बोलताना दिसत आहे. दोन्ही पक्षाचे हतबलता वेगवेगळ्या प्रश्नांच्या माध्यमातून दिसत येत असल्याची टीका देखील पाटील यांनी केली.

राज्यातील कारखान्यांना दिलेल्या पैशावरून पाटील म्हणाले की,राज्य सरकारला माझी विनंती आहे जे एनसीडीसी कडून पैसे आलेले आहेत सरकारने त्याची गॅरंटी घेतलेली आहे. मात्र त्याचे व्याज देखील काही कारखान्यांनी भरलेले नाही. 200 कोटी कर्ज घेऊन देखील 75 हजार क्रशिंग काही कारखान्यांनी केलेले नाही. शासनाचा पैसा नेमका कुठे खर्च होतो त्याचं दायित्व कोणाला आहे की नाही?

एकाच कारखान्याबद्दल विचार न करता इंडस्ट्री ही राज्याची आहे. राज्यातील सर्व साखर कारखाने हे शेतकऱ्यांसाठी काम करतात.. सर्वांना धरून धोरण झाले तर राज्याचे त्याचा विचार केला हे सिद्ध होईल, असे देखील त्यांनी सांगितले. कोल्हापूरच्या हद्दवाढीवर बोलताना ते म्हणाले, सत्ताधारी लोकांनी हा निर्णय घ्यायचा आहे. ते काय करणार आहेत याशिवाय आम्ही तर बोलून काय उपयोग आहे.