छत्रपती संभाजीनगर : परतुरचे भाजपा आमदार बबनराव लोणीकर यांनी बुधवारी एका जाहीर कार्यक्रमात सोशल मीडियावर टीका करणाऱ्यांचा उद्धार केला. कुचरवट्यावर टवाळकी करणारे दहा-बारा कार्टी, असा उल्लेख करत 'तुमच्या माय बापाचे पेन्शन या लोणीकरने सुरू केली. तुझ्या बापाला पेरणीसाठी मोदी सरकार सहा हजार रुपये देते. तुझी बहीण,बायको,आई यांना लाडकी बहीण योजनेतून पंधराशे रुपये लोणीकरमुळे मिळतात, अशा शब्दात वायफळ बडबड केली. बबनराव लोणीकर यांच्या या मुजोर भाषेविरुद्ध संतापाची लाट आहे.
विधान परिषदेचे विरोधी पक्षनेते तथा शिवसेना उद्धव बाळासाहेब ठाकरे पक्षाचे नेते अंबादास दानवे यांनी बबनराव लोणीकर यांना ही भाषा बरी नव्हे, असे सांगत तुमची आमदारकी या जनतेमुळेच असल्याचे सुनावले. जनतेच्या अंगावरील कपडे, बूट याचा उल्लेख करताना लोणीकर यांनी आपल्या अंगावरील कपडे, बूट एवढेच नाही तर गाडीमधील डिझेलही या जनतेमुळेच आहे, याचे भान राखायला हवे, असा टोलाही लगावला.
राज्याचे माजी मंत्री तथा परतूरचे विद्यमान भाजप आमदार बबनराव लोणीकर हे कायम आपल्या वादग्रस्त विधानांमुळे चर्चेत असतात. दोन दिवसांपूर्वीच मतदार संघातील एका गावात विधानसभा निवडणुकीत आपल्याला कमी मतदान झाल्याचा राग लोणीकर यांनी व्यक्त केला. गावातील सिमेंट काँक्रीटच्या रस्त्याच्या भूमिपूजनासाठी आले असता त्यांनी गावातील वरिष्ठ आणि तरुण भाजप कार्यकर्त्यांना सुनावले.
हक्काचे गाव म्हणून मी हे मतदारसंघात घेतले पण तुम्ही आणि काही तरुण टाळके उबाठाच्या नादाला लागले. जे कधी तुमच्या सुखदुःखात येत नाही त्यांच्याकडे जाऊन काय साधले? मी पाच वर्षातून एकदा तुम्हाला कमळ निशाणीवर फुली मागायला येतो, ती ही तुम्ही मला या वेळेस दिली नाही. तुम्हाला मी आठ कोटीचा निधी मंजूर केला तो मला आताही रद्द करता येईल , पण मी तसं करणार नाही. तुम्हाला शेवटची संधी देतो इथून पुढे जर मतदान कमी झालं तर मी तुमच्या गावावर फुली मारेल, अशी जाहीर धमकी देत बबनराव लोणीकर यांनी आगपाखड केली होती.
त्यांच्या या भाषणाची चर्चा कमी होत नाही तोच काल परतुरमध्ये पुन्हा टीकाकारांवर त्यांनी तोंडसुख घेतले. अगदी त्यांच्या आई- बाप, बायको, बहिणीचा उद्धार केल्याने लोकांमध्ये रोष आहे. या पार्श्वभूमीवर अंबादास दानवे यांनी एक्स वर लोणीकर यांना फटकारताना अशी भाषा बरी नसल्याचे म्हटले आहे.
ही ब्रिटिशांची देशी आवृत्ती! लोकशाहीत ही भाषा बरी नव्हे बबनराव. कारण.. तुमचे कपडे,बूट या जनतेमुळे.. आमदारकी जनतेमुळे.. तुमच्या गाडीतील डिझेल जनतेमुळे.. तुमचे विमानाचे तिकीट जनतेमुळे.. नेतेगिरी जनतेमुळे.. विधानसभेतील स्थान जनतेमुळे.. यांचे हे बोल लक्षात ठेवा. निवडणूक येते आहे, अशा शब्दात अंबादास दानवे यांनी लोणीकर यांच्या विधानाचा समाचार घेतला.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.