Shahaji Bapu Patil: आमदार शहाजी बापू अडचणीत; मतदारसंघातील ४५ सरपंचांनी घेतला 'हा' मोठा निर्णय

Solapur News : सांगोला मतदारसंघातील शिंदे गटाचे आमदार शहाजी बापू पाटील त्यांच्या काय झाडी काय डोंगर या डायलॉगमुळे एका रात्रीत प्रकाशझोतात आले. त्यानंतर महाराष्ट्रातच नाहीतर जगभरात बापूंचे चाहते निर्माण झाले आहेत. तसेच शिंदे गटातील प्रमुख नेत्यांमध्ये बापूंनी स्थान मिळवलं. पण आता हेच बापू अडचणीत आले आहेत.

शहाजी बापू पाटील यांच्या सांगोला मतदारसंघातील तब्बल 45 ग्रामपंचायतींच्या सरपंचांनी सोलापूर येथे बेमुदत उपोषणाचं अस्त्र उपसलं आहे. शेतकरी कामगार पक्षाची सत्ता असलेल्या ग्रामपंचातींची विकास कामे राजकीय दबावापोटी प्रलंबित करण्यात येत असल्याचा खळबळजनक आरोप सरपंचांनी केला आहे. डॉ. बाबासाहेब देशमुख, चंद्रकांत देशमुख आणि बाबा करांडे यांच्यासह जवळपास शेकडोच्या संख्येने कार्यकर्ते सांगोल्याहून सोलापुरमध्ये उपोषणात सहभागी होण्यासाठी आले आहेत.

शिंदे गटाचे आमदार शहाजी बापू पाटील (Shahaji Bapu Patil) आणि प्रशासकीय अधिकारी यांच्याविरोधात सोलापूरमध्ये शेतकरी कामगार पक्षाकडून बेमुदत उपोषण केलं जात आहे. शेकापच्या ताब्यात असलेल्या ग्रामपंचायत सदस्यांनी जिल्हा परिषद सीईओना याबाबत निवेदन दिले होते.

निवेदन देऊन पंधरा दिवस लोटले तरी कोणतीच कारवाई न झाल्याने आजपासून बेमुदत उपोषण करत आहोत. राज्य सरकारकडून मिळणाऱ्या निधीबाबत स्थानिक लोकप्रतिनिधींकडून अधिकाऱ्यांवर दबाव आणला जात आहे. जलजीवन मिशन मधील कामात भ्रष्टाचार केला जातोय. त्यामुळे याची चौकशी व्हावी अशी आमची मागणी आहे.

मतदारसंघातील अनेक कामे झालीच नाहीत. मात्र, त्याची बिले उचलली गेलीत त्याची चौकशी व्हावी अशी आमची मागणी आहे. आमचे आमदार शहाजी बापूंना आमचे आव्हान आहे त्यांनी याबाबत खुलासा करावा. संबंधित निधी वाटपातील अधिकाऱ्यांना कार्यमुक्त न केल्यास जिल्हा परिषदेला टाळे ठोकणार असल्याचा इशारा शेकापच्या पदाधिकाऱ्यांनी दिला आहे.

शेकाप पक्षाच्या 45 गावातील सरपंचांनी काही दिवसांपूर्वी सोलापूर जिल्हा परिषदेच्या समाज कल्याण विभागाचे अधिकारी आणि अतिरिक्त मुख्य कार्यकारी अधिकारी संदीप कोहीनकर यांचीही भेट घेतली होती. यावेळी त्यांनी दलित वस्ती सुधारणासाठी निधी मिळत नसल्याने 45 गावांचा विकास थांबला आहे.

गावांमधील दलित वस्तीच्या सुधाराणांसाठी जिल्हा प्रशासनाकडून समान निधी मिळत नाही. तसेच ग्रामपंचायतींनी केलेला ठराव आमदार ग्राह्य धरत नाहीत असा शहाजी बापूंविरोधातील तक्रारींचा पाढाच यावेळी सरपंचांनी प्रशासकीय अधिकार्यांसमोर वाचला होता.