Shahaji Patil : शिंदे -फडणवीस सरकार कार्यकाल पूर्ण करणार...

Shahaji Patil : शिवसेनेत दोन गट पडल्यावर शिंदे गटाने भाजप समवेत राज्यात सत्ता स्थापन केली आहे. शिंदे गटाचे प्रवक्ते आमदार शहाजी बापू पाटील ( Shahaji Patil ) यांनी शिंदे-फडणवीस सरकार कार्यकाल पूर्ण करणार असल्याचा विश्वास व्यक्त केला. भाळवणी (ता. पारनेर) येथे शिंदे गटाचे तालुकाप्रमुख विकास रोहकले यांच्या संपर्क कार्यालयास आमदार पाटील यांनी भेट दिली. त्यावेळी ते बोलत होते.

आमदार पाटील म्हणाले, शिंदे -फडणवीस सरकार हे उर्वरित अडीच वर्षांचा कार्यकाल पूर्ण करणार असून यात कोणती शंका नसल्याचे सांगत या सरकारच्या काळात राज्य प्रगतीपथावर जाणार असून जनतेची खंबीर साथ असल्याने आगामी लोकसभा विधानसभा निवडणुकीत घवघवीत यश मिळणार असल्याचे सांगोल्याचे आमदार शहाजी बापू पाटील यांनी सांगितले.

पाटील म्हणाले, पारनेर आणि सांगोला विधानसभा मतदारसंघातील शेतीचा पाणी प्रश्न सारखाच असून पाणी प्रश्नावर मागणी करणारे नेतृत्व कमी पडल्याने हा प्रश्न अनेक वर्ष प्रलंबितच आहे. पारनेरच्या शेतीच्या पाण्याच्या प्रश्नाचे गाऱ्हाणे राज्य सरकारकडे मांडणार आहोत.

तालुकाप्रमुख विकास रोहोकले यांच्यात प्रभावी नेतृत्व क्षमता असून सर्वसामान्य जनतेसाठी त्यांचे काम चांगले आहे आगामी काळात रोहोकले यांना राज्य सरकारच्या माध्यमातून व आपण स्वतःही मोठी ताकद निर्माण करून देणार आहोत, असेही त्यांनी सांगितले.