Parth Pawar : शंभूराज देसाईंना पार्थ पवार भेटले अन् चर्चांना उधाण आलं

Parth Pawar : विरोधी पक्षनेते अजित पवार (Ajit Pawar) यांचे सुपुत्र राष्ट्रवादीचे (NCP) युवा नेते पार्थ पवार यांनी आज साताऱ्याचे पालकमंत्री शंभुराज देसाई यांची मुंबईतील पावनगड या शासकीय निवासस्थानी भेट घेतली. पार्थ पवार यांनी अचानक शंभूराज देसाई यांची भेट घेतल्याने राजकीय वर्तुळात चर्चांना उधाण आलं आहे. मात्र, ही भेट खासगी असल्याचे सांगितले जात आहे.

पार्थ पवार यांनी आज शंभूराज देसाई यांची त्यांच्या पावनगड या मुंबईतील शासकीय निवासस्थानी भेट घेतली. ही भेट खासगी असून यावेळी विविध विकासकामांवर चर्चा झाल्याचे सांगण्यात आले आहे. या भेटीबाबत पार्थ पवार यांनी काहीही भाष्य केले नाही. त्यातच भाजपचे आमदार गोपीचंद पडळकर यांनी केलेल्या वक्तव्यामुळे राजकीय वर्तुळात नवी चर्चा रंगली आहे.

गोपीचंद पडळकर म्हणाले, ''पार्थ पवार अस्वस्थ आहेत. त्यामुळे त्यांनी शंभूराजे देसाई यांची भेट घेतली असावी. रोहित पवार हे आमदार झाले. बारामती अॅग्रोही त्यांच्याकडे आहे. महाराष्ट्र क्रिकेट बोर्डाचे अध्यक्षही झाले आहेत. आजोबांकडून अन्याय होत असल्याची भावना पार्थची असेल'', असं गोपीचंद पडळकर (Gopichand Padalkar) हे पार्थ पवार आणि शंभूराज देसाई यांच्या भेटीनर बोलताना म्हणाले.

''तसेच हक्काच्या मतदारसंघात अडीच लाखांहून अधिक मतांनी पराभूत झालाचे शल्य पार्थ पवारांच्या मनात आहे. त्यामुळेच ही भेट झाली असावी. पार्थ पवार यांनाही राजकारणात स्थिर व्हायचे असेल. पण भेट का घेतली? काय चर्चा झाली हे मला माहीत नाही'', असं गोपीचंद पडळकरांनी या भेटीवर भाष्य केलं आहे. दरम्यान, पार्थ पवार (Parth Pawar) आणि शंभूराज देसाई (Shambhuraj Desai) यांच्या भेटीमुळे राजकीय वर्तुळात चर्चांना उधाण आलं आहे.