Satara ZP : सातारा ZPतील सत्तेबाबत शंभूराज देसाईंचे स्पष्ट संकेत; ‘दोन्ही राष्ट्रवादी अन्‌ शिवसेनेची बेरीज....’

Satara, 12 February : सातारा जिल्हा परिषदेच्या निवडणुकीत महायुतीमधील पक्षांमध्ये कमालीची चुरस दिसून आली. भाजपने इतर दोन पक्षांशी युती न करता स्वबळावर लढण्याचा निर्णय घेतला. मात्र निकालानंतर भाजपला मोठी चपराक बसल्याचे दिसून येते. जिल्हा परिषदेची सूत्रे आता राष्ट्रवादी काँग्रेस आणि शिवसेनेकडे जाण्याची चिन्हे आहेत, तशा हालचालीही होताना दिसून येत आहेत. सातारचे पालकमंत्री तथा शिवसेना नेते शंभूराज देसाई यांनी तर पाटणमधील कार्यक्रमात बोलताना झेडपीवर सत्ता कोणाची येणार, याचे स्पष्ट संकेत दिले आहेत.

सातारा जिल्हा परिषदेच्या ६५ जागांपैकी सर्वाधिक २७ जागा ह्या भाजपने जिंकल्या आहेत. मात्र, सत्तेची सूत्रे शिवसेना (१५ जागा) आणि राष्ट्रवादीच्या (२० जागा) हाती आहेत. त्यातच निवडणुकीपूर्वी भाजप हा स्वबळावर, तर दोन्ही राष्ट्रवादी आणि शिवसेनेने आघाडी करून निवडणूक लढवली होती. त्यामुळे निवडणूक आघाडीमुळे राष्ट्रवादी काँग्रेस आणि शिवसेनेकडून सत्ता स्थापनेच्या हालचाली सुरू झाल्या आहेत.

निकालानंतर दुसऱ्याच दिवशी पालकमंत्री शंभूराज देसाई, मदत व पुनर्वसन मंत्री मकरंद पाटील, खासदार नितीन पाटील आणि संजीवराजे नाईक निंबाळकर यांच्यात सत्ता स्थापनेबाबत बैठक झाली. त्या बैठकीत भाजपला वगळून सातारा जिल्हा परिषदेत सत्ता स्थापन करण्याबाबत चर्चा झाली. त्यात पहिल्या अडीच वर्षांसाठी अध्यक्षपद राष्ट्रवादीकडे, तर उपाध्यक्षपद हे शिवसेनेकडे असा फार्म्युल्यावर चर्चा झाली आहे. त्यामुळे सातारा जिल्हा परिषदेचा अध्यक्ष हा राष्ट्रवादी काँग्रेसचा होणार, असे मानले जात आहे.

दरम्यान, पालकमंत्री शंभूराज देसाई यांनी आभाराच्या सभेत बोलताना भाजप नेत्यांना सूचक इशारा देताना सातारा जिल्हा परिषदेत सत्ता कोणाची येणार, याचे स्पष्ट संकेत देसाई यांनी दिले आहेत. त्यामुळे साताऱ्यात भाजपला विरोधी बाकावर बसावे लागण्याची चिन्हे आहेत. पण, देसाई यांनी भाजप काही हातावर हात ठेवून बसलेला नाही, असेही म्हटलेले आहे, त्यामुळे साताऱ्या पडद्याआड काय घडामोडी सुरू आहेत, याची जिल्ह्याला प्रचंड उत्सुकता आहे.

ज्या ज्या मंत्र्यांनी माझ्या मतदारसंघात येऊन माझ्यावर टीका केली, त्यांना मी उत्तर देणार नाही. पण, नऊ तारखेला माझ्या मतदारसंघातील जनता नऊ तारखेला उत्तर देईल. देसाई गटाचे लोक शांत आहेत, तोवर शांत असतात. पण देसाई गटाच्या नेत्याची खोड काढली की त्यांची पक्की जिरवायची ताकद या देसाई गटात आहे, हे लक्षात असू द्या.

सातारा जिल्हा परिषदेत भाजपची काय अवस्था झाली हो. एका बाजूला राष्ट्रवादी काँग्रेस शरदचंद्र पवार पक्ष, राष्ट्रवादी अजित पवार आणि शिवसेना ही जर एका बाजूला केली आणि दुसऱ्या बाजूला भाजप केली तर बेरीज कुठे जाते बघा. अति तिथं माती. अती केल्यानंतर लोकसुद्धा योग्य संधी वाट पाहत असतात, असे सांगून शंभूराज देसाई यांनी सातारा जिल्हा परिषदेतील सत्ता समीकरणाचे स्पष्ट संकेत दिल्याचे मानले जात आहे.