Sharad Pawar Karmala Tour : प्रकृती बिघडल्याने शरद पवार रुग्णालयात दाखल; करमाळा दौरा रद्द

Solapur, 02 November : ज्येष्ठ नेते शरद पवार यांना प्रकृती अस्वास्थ्यामुळे (कफ) पुण्यातील रुबी हॉल क्लिनिकमध्ये ॲडमिट करण्यात आले आहे. खासदार सुप्रिया सुळे यांनी सोशल मीडियाच्या माध्यमातून ही माहिती दिली आहे. त्यामुळे त्यांचा आजचा नियोजित करमाळा दौरा रद्द झाला आहे. त्यांचा बार्शी आणि बीडमध्येही नियोजित दौरा होता. तो आता लांबणीवर गेला आहे.

शरद पवार यांनी रविवारी (ता. ०१ नोव्हेंबर) माढा तालुक्यातील तुळशी येथील दुष्काळी परिस्थितीची पाहणी केली. पाहणीनंतर त्यांनी तुळशी गावासाठी ५० लाख रुपयांची मदतही केली आहे. त्यानंतर ते आज करमाळा तालुक्यात दुष्काळी गावाच्या पाहणीसाठी येणार होते, तशी माहिती आमदार नारायण पाटील यांनी दिली होती.

करमाळ्यानंतर पवार हे बार्शी आणि पुढे मराठवाड्यातही पाहणी दौरा करणार होते. मात्र, त्यांना कफ झाल्यामुळे त्यांना तातडीने पुण्यातील रुबी हॉल क्लिनीकमध्ये ॲडमिट करण्यात आले आहे. त्याबाबतची माहिती सुप्रिया सुळे यांनी सोशल मीडियाच्या माध्यमातून दिली आहे.

बाबांना कफचा त्रास जाणवू लागल्यामुळे त्यांना पुण्यातील 'रुबी हॉल क्लिनिक'मध्ये दाखल करण्यात आले आहे. सध्या त्यांच्या वैद्यकीय चाचण्या सुरू असून, त्यांची प्रकृती स्थिर आहे, असे खासदार सुप्रिया सुळे यांनी आपल्या पोस्टमध्ये म्हटले आहे.

शरद पवार हे रविवारी (ता. ०२ नोव्हेंबर) माढा तालुक्याच्या दौऱ्यावर आले होते, त्यावेळी करमाळ्याचे आमदार नारायण पाटील त्यांच्यासोबत नव्हते. ते करमाळ्यातील पवार यांच्या दौऱ्याची तयारी करत होते. तत्पूर्वी आमदार पाटील यांनी गोविंद बागेत जाऊन पवार यांची भेट घेतली होती. त्यानंतर पवार हे माढ्याच्या दौऱ्यावर आले होते, तर आमदार पाटील हे पवारांच्या दौऱ्याची तयारी करण्यासाठी करमाळ्याला गेले होते.

कफचा त्रास जाणवू लागल्यामुळे पवार यांना रुबी हॉलमध्ये ॲडमिट करण्यात आले आहे, त्यामुळे त्यांचा आजचा करमाळ्याचा दुष्काळी दौरा रद्द झाला आहे. दिवाळीनंतर किंवा त्याअगोदर त्यांचा दौरा होईल, असे पाटील यांनी म्हटले आहे.