Solapur News: शिवसेनेला दे धक्का; माजी आमदार नारायण पाटील शिंदे गटात

सोलापूर : एकनाथ शिंदे यांच्या बंडानंतर शिवसेनेतील अनेक आजी-माजी पदाधिकारी उघडपणे नाराजी व्यक्त करू लागले आहे. अनेकांनी शिंदे गटात जाणे पसंत केले आहे. आता सोलापूरातून शिवसेनेला धक्का बसला आहे. करमाळ्याचे शिवसेनेचे माजी आमदार नारायण पाटील (Narayan Patil) हेही शिंदे गटात सामील झाले आहेत. (Shiv Sena Latest Marathi News)

नारायण पाटील हे 2014 च्या विधानसभा निवडणुकीत शिवसेनेच्या तिकीटावर निवडून आले होते. पण 2019 मध्ये शिवसेनेने रश्मी बागल यांना उमेदवारी दिली होती. त्यामुळे पाटील यांनी बंडखोरी करत अपक्ष निवडणूक लढवली. या निवडणुकीत त्यांचा निसटता पराभव झाला. तेव्हापासून ते शिवसेनेत नाराज होते.

दरम्यान, गुवाहाटीतील हॉटेलमध्ये मुक्कामी असलेल्या एकनाथ शिंदे यांच्यासह शिवसेनेच्या (Shiv Sena) बंडखोर आमदारांमध्ये दोन गट पडल्याचा दावा पर्यावरण मंत्री व युवा सेना प्रमुख आदित्य ठाकरे यांनी केला आहे. जवळपास 15 ते 16 आमदार अजूनही आमच्या संपर्कात आहेत. त्यापैकी काहींशी नुकताच संपर्क झाल्याचेही ठाकरे म्हणाले आहे. पण ठाकरे हा दावा करत असले तरी प्रत्यक्षात हॉटेलमध्ये सर्व आमदार एकत्रितपणे मजेत राहत असल्याचे अनेक व्हिडीओ व छायाचित्रांवरून दिसत आहे. (Eknath Shinde Latest News)

आदित्य ठाकरे (Aaditya Thackeray) यांनी सोमवारी बोलताना हे वक्तव्य केलं आहे. ते म्हणाले, आमच्या संपर्कात नसलेल्या दुसऱ्या गटातील आमदार पळून गेलेले आहे. त्यांच्यामध्ये परत येण्याचे धाडस आणि नैतिकता नाही. मुख्यमंत्री उद्धव ठाकरे यांना प्रकृतीमुळे चोवीस तास काम करणे शक्य नव्हते, त्यानंतर ते काम करत होते. त्या काळात हे षडयंत्र रचलं गेल्याची नाराजी आदित्य यांनी व्यक्त केली.

ज्यांना पुन्हा परत यायचे आहे, त्यांच्यासाठी आमचे दरवाजे खुले आहे. त्यांच्यामध्ये खरंच हिंमत असेल तर पदाचे राजीनामे देऊ आमच्यासमोर उभे राहून दाखवावे, असं आव्हानही ठाकरे यांनी केले. फ्लोअर टेस्ट आधी त्यांना नैतिकतेची टेस्ट द्यावी लागेल, असंही ते म्हणाले.

पुरस्थिती असलेल्या गुवाहाटीतील हॉटेलबाहेर सीआरपीएफ, आर्मीची सुरक्षाव्यवस्था तैनात करण्यात आली आहे. वास्तविक या जवानांना काश्मिरी पंडितांच्या सुरक्षेसाठी तैनात करायला हवे, असा टोला आदित्य ठाकरे यांनी कुणाचंही नाव न घेता भाजपला लगावला.