Shivsena News: शिवसेना प्रवक्त्या ज्योती वाघमारेंची ठाकरेंवर जहरी टीका; म्हणाल्या, आदित्य ठाकरे ओसाड नगरीचे राजकुमार

Solapur News: कर्नाटकमध्ये नव्या सरकारचा नुकताच शपथविधी सोहळा पार पडला. या शपथविधी सोहळ्याच्या निमत्रंणावरून उद्धव ठाकरे आणि आदित्य ठाकरे यांच्यावर शिवसेना शिंदे गटाच्या प्रवक्त्या प्राध्यापक ज्योती वाघमारे यांनी जोरदार टीका केली आहे.

शिवसेनेला (शिंदे गट) सोलापूरच्या ज्योती वाघमारे या प्रवक्त्या म्हणून लाभल्या आहेत. काही दिवसांपूर्वीच प्राध्यापक ज्योती वाघमारे यांनी शिवसेनेत जाहीर प्रवेश केला. त्यानंतर त्यांनी आता शिवसेनेच्या ठाकरे गटावर टीकेचा सपाटा सुरू केला आहे.

शिवसेनेच्या उपनेत्या सुषमा अंधारे यांच्यावर फर्निचरसाठी कार्यकर्त्यांकडे पैशाची मागणी केल्याचे तसेच त्यांना मारहाण झाल्याचा आरोप त्यांच्याच पक्षातील एका पदाधिकाऱ्याने केला होता. त्यावरून आता ज्योती वाघमारे यांनी त्यांच्यावर जोरदार हल्लाबोल केला आहे. "जिकडे राशन तिकडे भाषण", असा टोला त्यांनी सुषमा अंधारे यांना लगावला आहे.

कर्नाटकमध्ये काँग्रेसची एक हाती सत्ता आली. मात्र, नव्या सरकारच्या शपथविधी सोहळ्याला उद्धव ठाकरे यांना बोलावण्यात आले नसल्याचा दावा करत ज्योती वाघमारे यांनी ठाकरेंवर सडकून टीका केली.

उद्धव ठाकरे यांचा उल्लेख उद्‌ध्वस्त ठाकरे आणि आदित्य ठाकरे यांना ओसाड नगरीचे राजकुमार असा खोचक टोला लगावत "घरात नाही आना, पण मला हवालदार म्हणा" असं म्हणत जोरदार घणाघात केला. दरम्यान, त्यांच्या या टिकेला सोलापुरातील ठाकरे गटाचे नेते काय प्रत्युत्तर देतात? हे पाहणे औत्सुक्याचे ठरणार आहे.

Edited By- Ganesh Thombare