Satara ZP : सातारा ZP तील सत्तेबाबत शिवेंद्रराजेंचं मोठं विधान, ‘आम्ही शंभूराज देसाईंकडे बघत बसलोय...’

Satara, 12 February : सातारा जिल्हा परिषदेत त्रिशंकू स्थिती असल्याने सत्ता कोणाची येणार, याची उत्सुकता संपूर्ण जिल्ह्याला लागली आहे. त्यातच आज जिल्हा नियोजन समिती बैठकीच्या निमित्ताने पालकमंत्री शंभूराज देसाई आणि सार्वजनिक बांधकाम मंत्री तथा भाजप नेते शिवेंद्रसिंहराजे भोसले एकत्र आले होते. त्या बैठकीत सातारा जिल्हा परिषदेच्या अध्यक्षाबाबत शिवेंद्रराजेंनी मोठे विधान केले आहे.

सातारा जिल्हा परिषद (Satara Zilla Parishad) निवडणुकीत भारतीय जनता पक्षाने सर्वाधिक २७, राष्ट्रवादी २० तर, शिवसेनेने १५ जागा जिंकल्या आहेत. निवडणुकीपूर्वी राष्ट्रवादी आणि शिवसेनेने आघाडी केली होती. त्यामुळे त्यांच्याकडून सत्ता स्थापनेच्या हालचाली सुरू आहेत. मात्र, शंभूराज देसाई यांनी शिवसेना सदस्यांची मते विचारात घेऊन त्याबाबतचा अहवाल उपमुख्यमंत्री एकनाथ शिंदे यांना पाठविण्यात येईल आणि ते अंतिम निर्णय घेतील, असे म्हटले आहे, त्यामुळे शिवसेना आणि राष्ट्रवादीची युती सत्तेवर येणार की भाजप ऐनवेळी गेम पालटवणार याची चर्चा जिल्ह्यात रंगली आहे.

नियोजन समितीच्या बैठकीनंतर जिल्हाधिकारी कार्यालयाच्या बाहेर आलेले शिवेंद्रराजे भोसले (Shivendraraje Bhosale) आणि शंभूराज देसाई यांना माध्यमांच्या प्रतिनिधींनी गाठले. त्यावेळी त्या दोघांमध्ये पुन्हा जुगलबंदी रंगली. बांधकाम मंत्री शिवेंद्रराजेंना सातारा जिल्हा परिषदेतील सत्तेच्या अनुषंगाने विचारण्यात आले, तेव्हा ते म्हणाले, शंभूराज देसाई हे पालकमंत्री आहेत, त्यांच्या पालकत्वाखाली आम्ही आहोत.

डीपीसीच्या बैठकीत शंभूराज देसाई मला म्हणाले ‘शेजारी बसा. आम्ही हात पुढे करतोय, तर तुम्ही घेईनात.’ त्यावर मी त्यांना म्हटलं, अहो आमची मिठी मारायची तयारी आहे. पण तुम्हाला चालते का नाही...’ असेही मंत्री भोसले यांनी स्पष्ट केले.त

तुम्हाला (शिवेंद्रराजे भोसले) दोन वेळा बैठकीला बोलावलं गेलं, पण तुम्ही काय गेला नाहीत, त्यामुळे शंभूराज देसाई यांनी नाराजी व्यक्त केली आहे. यावर शिवेंद्रराजे म्हणाले, असं नाही. मला त्यांनी थेट बोलावलं तर मी कधी येत नाही, असं कधी होत नाही. व्हाया व्हाया निरोप आल्यामुळे जरा घोटाळा झाला.

जिल्हा परिषदेत सत्ता स्थापनेसाठी एकत्र येणार का, यावर शिवेंद्रराजेंनी ‘आम्ही जिल्ह्याच्या विकासासाठी एकत्र आहोत. आता पुढचे विषय पुढे बघू,’ असे सांगून थेट उत्तर देणे टाळले. जिल्हा परिषदेतील सत्ता स्थापनेबाबत आता शंभूराज देसाई यांनी सांगायचं, असे भोसले म्हणताच शंभूराज देसाई मोठ्याने हासले.

आम्ही काय आता शंभूराज यांच्याकडे बघत बसलोय, त्यांनी सांगायचं. भारतीय जनता पक्ष आकड्याने मोठा असला तरी शंभूराज हे आमच्यापेक्षा मोठे आहेत. मोठ्यांनी सांभाळून घेतलं पाहिजे. त्यांनी दोनवेळा बैठकीला बोलावलं तेव्हा वातावरण जरा नीट नव्हतं. आता नीट झालं आहे, असे सांगून झेडपीतील निकालावरही शिवेंद्रराजेंनी अप्रत्यक्ष भाष्य केले.