शिवसेनेने मारले कराडात सोमय्यांच्या पोस्टरला जोडे

कऱ्हाड : भाजप नेते किरीट सोमय्या यांच्यावर देशद्रोहाचा गुन्हा दाखल करून त्यांना तुरुंगात टाकावे, या मागणीसाठी आणि शिवसेनेचे नेते खासदार संजय राऊत यांच्या समर्थनार्थ शिवसेनेच्यावतीने आज कराड दत्त चौकात आंदोलन करण्यात आले. सोमय्या यांच्या प्रतिकात्मक पोस्टरवर 'जोडे मारो' आंदोलन केले.

भ्रष्ट सोमय्या हाय हाय..., निषेध असो निषेध असो.. किरीट सोमय्यांचा निषेध असो..., सोमय्या मुर्दाबाद अशा घोषांनांनी परिसर दणाणुन गेला. यावेळी शिवसेना तालुका प्रमुख नितीन काशीद, कऱ्हाड शहर प्रमुख शशिकांत हापसे, ग्राहक कक्षाचे उपजिल्हा प्रमुख राजेंद्र माने, माजी नगरसेवक प्रमोद वेर्णेकर, अजित पुरोहीत, काकासाहेब जाधव, साजीद मुजावर, शेखर बर्गे, दिलीप यादव, सतीश पाटील, दक्षिण तालुका उपप्रमुख सुनिल पाटील, जिल्हा महिला संघटीका अनिता जाधव, विद्या शिंदे, मधुकर शेलार, शंभुराज रैनाक यांच्यासह शिवसैनिक उपस्थित होते.

नितीन काशीद म्हणाले, ''भाजप नेते किरीट सोमय्या यांनी आयएनएस विक्रांतच्या नावाखाली गोळा केलेल्या पैशांचा किरीट सोमय्या यांनी कोट्यवधी रुपयांचा घोटाळा केल्याचे माहिती अधिकारातून उघडकीस आली आहे,'' असे सांगून त्यांच्यावर देशद्रोहाचा गुन्हा दाखल करून त्यांना तुरुंगात टाकावे, अशी मागणी त्यांनी केली. यावेळी मागण्यांचे निवेदन वरिष्ठ पोलिस निरीक्षक बी. आर. पाटील यांना देण्यात आले.