Kolhapur News : कोल्हापुरातील ठाकरे यांच्या शिवसेनेचे शहराध्यक्ष सुनील मोदी यांच्यावर शेतकरी सहकारी संघाच्या संचालकपदाची कारवाईची टांगती तलवार कायम आहे. निवडणुकीपूर्वी शेतकरी संघाचे संचालक सुनील मोदी यांनी आपल्यावर कोणत्याही बँकेचे किंवा सहकारी संस्थेचे कर्ज नसल्याची माहिती, संघाकडे दिली होती. मात्र जयसिंगपूर येथील श्री दत्त नागरी सहकारी पत संस्थेचे 73 लाख रुपयांचे कर्ज थकबाकी असल्याने सुनील मोदी यांना शेतकरी सहकारी संघाच्या संचालक पदावरून अपात्र करावे, अशी तक्रार देण्यात आली होती.
त्यावर बुधवारी मोदी यांनी सात दिवसांत जिल्हा उपनिबंधकांकडे म्हणणे सादर करावे. आदेश मुंबई उच्च न्यायालयाने दिले आहेत. तसेच तीन महिन्यात यावरती निकाल द्यावा, अशा सूचना जिल्हा उपनिबंधकांना दिल्या आहेत. त्यामुळे मोदी यांच्या संचालकपदावर टांगती तलवार आहे.
सहकारातील नियमानुसार निवडणुकीला इच्छुक असणाऱ्या किंवा ज्या संचालकांचे कर्ज थकीत असेल तर त्याला कोणत्याही संस्थेची निवडणूक लढवता येत नाही. शिवाय त्या संचालकांचे पद रद्द करण्यात येते. त्यानुसार शेतकरी संघाचे निवृत्त कर्मचारी आणि सभासद भगवान पाटील यांनी मोदी हे जयसिंगपूरमधील श्री दत्त पतसंस्थेत थकबाकीदार आहेत. अशी तक्रार दिली होती. थकबाकीदार असताना त्यांनी शेतकरी सहकारी संघाची निवडणूक लढवून ते संचालक पदावर कार्यरत आहेत.
मोदी यांचे जयसिंगपूर येथील संस्थेत 73 लाख रुपयांचे कर्ज थकीत आहे. त्याची परतफेड केलेली नाही. तसा पतसंस्थेनेही दाखला दिलेला आहे. त्यामुळे मोदी यांना पदावरून अपात्र करावे, अशी मागणी जिल्हा उपनिबंधकांकडे केली होती. त्यानंतर मोदी यांनी उच्च न्यायालयात दाद मागितली होती. मात्र न्यायालयाकडून (Bombay High Court) मोदी यांना धक्का देत जिल्हा उपनिबंधक यांना सात दिवसात म्हणणे घेण्याची सूचना दिल्या आहेत. त्याशिवाय तीन महिन्यात निकाल द्यावा.
दरम्यान, जिल्हा उपनिबंधकांच्या निर्णयाकडे लक्ष लागून राहिले आहे. भूविकास बँकेत थकबाकीदार असल्यामुळे सहकार कायद्यानुसार संघाचे माजी अध्यक्ष युवराज पाटील यांना पद सोडावे लागले आहे. याशिवाय, एम. एम. पाटील व मानसिंग पाटील यांनाही अपात्र व्हावे लागले. त्यामुळे या प्रकरणातही मोदी थकबाकीदार असतील, तर त्यांनाही या पदावरून अपात्र केले जाऊ शकते. त्यामुळे जिल्हा उपनिबंधकांच्या निर्णयाकडे लक्ष लागले आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.