Maharashtra Politics : 'दबाव गट' तयार करण्यासाठी घटक पक्षांची मोर्चेबांधणी सुरू ; राजू शेट्टींच्या पुढाकारात कोल्हापुरात..

Kolhapur : आगामी लोकसभा आणि विधानसभा निवडणुकीसाठी राजकीय पक्षांनी पक्षबांधणीला सुरूवात केली आहे. आपल्या जागा वाढविण्यासाठी प्रत्येक राजकीय पक्ष रणनीती आखत आहेत. निवडणुकीसाठी मोठ्या पक्षांची जोरदार तयारी सुरू असताना आता राज्यातील छोटे पक्ष एकत्र घेऊन आघाडी तयार करण्यासाठी प्रयत्न करीत आहेत. या पक्षांची लवकरच कोल्हापूर येथे बैठक होणार आहे.

अस्थिर राजकीय वातावरण आणि नेत्यांच्या सतत बदलत असलेल्या भूमिकेमुळे छोट्या पक्षांची गोची झाली आहे. मोठ्या पक्षांबरोबर जाताना आपलं अस्तित्व संपेल, अशी भीती सतत या पक्षप्रमुखांच्या मनात आहे. त्यामुळे या पक्षांनी एकत्र यावं, अशा हालचाली सुरू आहेत. यासाठी स्वाभिमानी शेतकरी संघटनेचे अध्यक्ष राजू शेट्टी यांनी पुढाकार घेतला आहे.

महिनाभरात या पक्षांची बैठक व्हावी, यासाठी प्रयत्न सुरू आहेत. प्रागतिक विकास मंच नावानं ही आघाडी होणार आहे. यामध्ये 13 पक्ष समाविष्ट होतील. स्वाभिमानी शेतकरी संघटना, शेकाप, स्वराज्य पक्ष, आम आदमी पार्टी, सीपीआय, लाल निशाण, बहुजन विकास आघाडी, समाजवादी पार्टी, जनता दल, सत्यशोधक कम्युनिस्ट पक्ष,बहुजन रिपब्लिकन सोशालिस्ट पक्ष, भाकप,माकप या पक्षांचा आहे. जर अशाप्रकारे आघाडी स्थापन झाल्यास राज्यातील अनेक मतदारसंघात ही आघाडी निर्णायक ठरेल. त्यामुळे या पक्षांच्या हालचालीकडे सर्वांचे लक्ष आहे.

Edited By : Mangesh Mahale