Maan : कुळकजाईचा तलाठी लाचलुचपतच्या जाळ्यात

दहिवडी : नोंदणीकृत कुलमुखत्यार पत्र व साठे खताच्या दस्ताची नोंद करून तसा सातबारा उतारा देण्यासाठी चार हजारांची मागणी कुळकजाईच्या तलाठ्याने केली होती. ही रक्कम स्वीकारताना त्याला लाचलुचपत विभागाने रंगेहात पकडले. त्यामुळे माण तालुक्यात खळबळ उडाली आहे.

यासंदर्भात लाचलुचपत विभागाकडून मिळालेल्या माहितीनुसार, नोंदणीकृत कुलमुखत्यार पत्र व साठेखताच्या दस्ताची नोंद करून तसा सातबारा उतारा देण्यासाठी कुळकजाई (ता. माण) येथील तलाठी युवराज एकनाथ बोराटे (वय ५५) यांने तक्रारदारांकडे चार हजार रूपयांची मागणी केली होती.

याबाबतची तक्रार प्राप्त झाल्यानंतर सातारा लाचलुचपत प्रतिबंधक विभागाचे पोलिस निरीक्षक विक्रम पवार, पोलिस नाईक विशाल खरात, पोलिस कॉन्स्टेबल तुषार भोसले यांनी बुधवारी सापळा रचला. तसेच सदर लाचेची रक्कम स्वीकारताना बोराटे यास रंगेहात पकडून ताब्यात घेतले.

पुण्याच्या लाचलुचपत प्रतिबंधक विभागाचे पोलिस अधीक्षक राजेश बनसोडे, अपर पोलीस अधीक्षक सुरज गुरव यांच्या मार्गदर्शनाखाली साताराचे पोलिस उपअधीक्षक सुजय घाटगे यांच्या नेतृत्वाखाली ही कारवाई करण्यात आली.मागील काही महिन्यांपासून माणमधील महसूल विभाग वेगवेगळ्या कारणांनी चर्चेत राहिला आहे. या कारवाईमुळे संपूर्ण महसूल विभाग हादरला आहे.