रेणू शर्मांवरील कारवाई बद्दल बोलताना धनंजय मुंडेच्या डोळ्यात अश्रू : म्हणाले...

अहमदनगर - राज्याचे सामाजिक न्याय मंत्री धनंजय मुंडे ( Dhananjay Munde ) यांच्याकडे पैशाची मागणी केल्या प्रकरणी मुंबई गुन्हे अन्वेशन विभाग व इंदोर पोलिसांनी संयुक्तपणे आरोपी रेणू शर्मा यांना अटक केली. या संदर्भात पत्रकारांशी बोलताना मंत्री धनंजय मुंडे यांना भावना व्यक्त करताना अश्रू अनावर झाले. ( Tears in Dhananjay Munde's eyes as he talks about Renu Sharma's action )

अहमदनगर जिल्ह्यातील शेवगाव तालुक्यातील शिंदोरी या गावात संत भगवान बाबा यांच्या 88 व्या नारळी सप्ताह निमित्त काल्याचे कीर्तन आयोजित करण्यात आले होते. सप्ताहाच्या काल्याच्या कीर्तनासाठी धनंजय मुंडे आले होते. भगवान गडाचे महंत नामदेव महाराज शास्त्री यांचे कीर्तन झाल्यानंतर धनंजय मुंडे यांनी पत्रकारांशी संवाद साधला. (Dhananjay Munde on Renu Sharma)

धनंजय मुंडे म्हणाले की, काळ आला होता. पण भगवान बाबा यांच्यामुळे वेळ आली नव्हती, असं म्हणताच धनंजय मुंडे यांना अश्रू अनावर झाले.

मला दोघेही सारखेच

यावेळी नामदेव शास्त्री महाराज यांनीदेखील आपलं मत मांडलं. "मला धनंजय मुंडे आणि पंकजा मुंडे दोघेही सारखेच. मात्र जो जवळ येणार त्याच्यावर मी प्रेम करणार. भगवानबाबाचे दरवाजे दोघांसाठीही उघडे आहेत. मात्र गडावर राजकीय भाषण नाहीच. माझ्या सर्व चौकशा झाल्या. मला बदनाम करण्याचा मोठे षडयंत्र रचले गेले. पण मी घाबरत नाही. मंदिराचे काम सध्या सुरू आहे. त्या मंदिराला लागणारा दगड हे गोपीनाथ मुंडे देणार होते. मात्र दुर्दैवाने ते होऊ शकले नाही. ते काम आज धनंजय मुंडे करणार आहेत", असे नामदेव शास्त्री महाराज म्हणाले.