Satara : मी नव्हे उदयनराजेंनी फोन कट केला... शंभूराज देसाईंचे स्पष्टीकरण

सातारा : खासदार उदयनराजे भोसले यांच्याशी फोन सुरू असतानाच आमच्या निवासस्थानी आमदार शिवेंद्रसिंहराजे दाखल झाले. मी त्यांचे स्वागत केले आणि उदयनराजेंना म्हटलं, एका बाजूला थोरल्या राजांचा फोन सुरू आहे आणि धाकटे राजे मला भेटायला आले आहेत, असे मी म्हटलं तेवढ्यात तिकडून फोन कट झाला. मी नव्हे तर उदयनराजेंनी फोन कट केला असे स्पष्टीकरण पालकमंत्री शंभूराज देसाई यांनी दिले आहे.

राज्य उत्पादन शुल्क मंत्री तथा साताऱ्याचे पालकमंत्री शंभूराज देसाई यांनी आज पाटण येथे लोकनेते बाळासाहेब देसाई सहकारी साखर कारखान्यावर पत्रकारांशी संवाद साधला. काल खासदार उदयनराजे भोसले यांचे समर्थक पालकमंत्र्यांकडे मजूर फेडरेशनच्या निवडणुकीच्यानिमित्ताने आले होते.

त्यावेळी उदयनराजेंशी पालकमंत्री फोनवरून बोलत होते. त्याच वेळी आमदार शिवेंद्रसिंहराजे भोसले तेथे आल्याने फोन कट झाला. हा फोन कोणी कट केला, याविषयी शंभूराज देसाईंना पत्रकारांनी विचारले असता ते म्हणाले, शुक्रवारी आमदार शिवेंद्रसिंहराजे भोसले हे माझी वेळ घेऊन निवासस्थानी आले. त्याच काळात राजे येण्यापूर्वी उदयनराजे यांचे कार्यकर्ते सुनील काटकर यांनी उदयनराजेंना फोन लावून दिला.

माझं बोलणं सुरू होतं. त्याच वेळी मी शिवेंद्रसिंहराजे तेथे आले त्यामुळे मी त्यांचे स्वागत केले आणि उदयनराजेंना म्हटलं एका बाजूला थोरल्या राजांचा फोन सुरू आहे. धाकटे राजे मला भेटायला आले आहेत, असे मी म्हटलं तेवढ्यात तिकडून फोन कट झाला. मी फोन कट केला नाही, असेही देसाईंनी नमुद केले.