Udayanraje Bhosale : 'मी खासदारकीचा राजीनामा देतो, मला नगराध्यक्ष व्हायचंय...', उदयनराजे भोसलेंच्या मनात काय?

Satara Politics Mayor Election : स्थानिक स्वराज संस्था निवडणुकीचे बिगुल वाजले आहे. महायुती आणि महाविकास आघाडी होणार की मैत्रीपुर्ण लढत होणार याची चर्चा सुरू असताना खासदार उदयनराजे भोसले यांनी धक्कादायक विधान केले आहे. 'मलाही नगराध्यक्ष व्हायची इच्छा होती त्यामुळे खासदारकीचा राजीनामा देतो, मला नगराध्यक्ष व्हायचं आहे.', असे उदयनराजे म्हणाले.

उदयनराजेंच्या या वक्तव्यामुळे सातारच्या राजकीय वर्तुळात वेगळ्याच चर्चा सुरू झाल्या आहेत. मात्र, उदयनराजे यांनी केलेले हे वक्तव्य म्हणजे मिश्किलपणे केलेली टिपण्णी आहे, असे बोलले जात आहे. कारण हे वक्तव्य करताना त्यांच्या चेहऱ्यावर हसू देखील होते.

सातारा पालिकेवर भाजप विरुद्ध इतर अशी लढत होण्याची शक्यता आहे. साताऱ्यात उदयनराजे आणि शिवेंद्रराजे यांच्या स्थानिक पातळीवरील आघाड्या या एकमेकांच्या विरोधात लढतात असा येथील इतिहास आहे. मात्र, विधानसभा, लोकसभा निवडणूकी पासून दोनही राजे भाजपात आल्याने आणि या पालिका निवडणूकीत पक्षश्रेष्ठींनी भाजपाच्या चिन्हाचा आग्रह धरल्याने दोन्ही आघाड्या 'भाजपा'च्या नेतृत्वात एकत्र लढणार असल्याचे चित्र आहे. उदयनराजेंनी आपल्या समर्थकांना मनोमीलनाची काळजी करु नका, असा कानमंत्र देत कामाला लागण्याचे संकेत दिले आहेत.

'साविआ'-'नविआ'तील सत्तासंघर्ष

सातारा पालिकेत उदयनराजेंची सातारा विकास आघाडी व शिवेंद्रराजेंच्या नगर विकास आघाडीशी लढत होत होती. मात्र, आता या दोन्ही आघाड्या एकत्र येत भाजपच्या नेतृत्वात निवडणूक लढणार आहेत. त्यामुळे भाजपचा (BJP) नगराध्यक्ष होण्याचे चित्र स्पष्ट असल्याचे बोलले जात आहे. मात्र, दोन्ही आघाड्यांकडून आपल्याला किती जागा मिळणार याचा अंदाज घेत आपापल्या पद्धतीने प्रभागात प्रचाराला सुरुवात केली आहे.