Election Tender Fraud : सोलापुरात निवडणूक कामांत भ्रष्टाचार? : टेंडर न काढताचा दिला वाहनांचा ठेका, अधिकाऱ्यांना हिशेब देता येईना...

Solapur, 25 August : सोलापूर महापालिका निवडणूक खर्चातील आर्थिक व्यवहारांवर गंभीर प्रश्न निर्माण करणारी बाब सुनावणीत पुढे येत आहे. अधिकाऱ्यांनी स्थायी समितीची मान्यता न घेता २ कोटी ११ लाखांची बिले परस्पर अदा केल्याचे प्रकरण ताजे असतानाच आता टेंडर न करताच वार्षिक ठेकेदाराला थेट वाहनाचा ठेका दिल्याचे उघडकीस आले आहे.

या प्रकरणी नगरसेवकांनी महिनाभरापूर्वी तक्रार केली असून आतापर्यंत दोन वेळा सुनावणी झाली. मात्र, संबंधित अधिकाऱ्यांना हिशेब देता आलेला नाही, त्यामुळे निवडणुकीच्या कामातही भ्रष्टाचार झाल्याचा संशय आणखीच बळावत चालला आहे.

सोलापूर महापालिकेच्या २०२५-२६ च्या सार्वत्रिक निवडणुकीत झालेल्या खर्चाच्या बिलांवर उपमहापौर ज्ञानेश्वरी देवकर, नगरसेवक मंजिरी किल्लेदार, अर्चना वडनाल, श्रद्धा पवार, सत्यजित वाघमोडे यांनी आक्षेप घेत आयुक्तांना निवेदन दिले आहे. नगरसेवकांच्या तक्रारीनंतर महापालिकेने समिती स्थापन केली आहे.

या समितीसमोर ता. ७ ऑगस्ट आणि २४ ऑगस्ट दोन वेळा सुनावणी झाली आहे. पहिल्या सुनावणीत उपमहापौर देवकर यांच्यासह नगरसेवकांनी निवडणुकीच्या कार्यकाळात करण्यात आलेल्या टेंडर प्रक्रियेपासून झालेल्या कामांची दिवसनिहाय तपशीलवार माहिती मागितली.

यामध्ये कोणत्याही प्रकारची माहिती उपलब्ध नसताना तसेच स्थायीची मान्यता न घेता दोन कोटी ११ हजार रुपयांचे बिले ठेकेदाराला दिल्याची माहिती समोर आली आहे. सोमवारी (ता. २४ ऑगस्ट) झालेल्या सुनावणीदरम्यान निवडणुकीच्या काळात टेंडरविनाच वाहनाचा ठेका रणजित टुर्स ॲण्ड ट्रॅव्हल्स या कंपनीला देण्यात आल्याचे समोर आले आहे.

वाटाघाडीसाठी निविदा समितीची बैठक घेण्यात आली. मात्र त्यामध्ये कोणत्याही प्रकारच्या वाटाघाटी करण्यात आल्या नसल्याचे दिसून आले. याबाबतची तपशीलवार माहिती द्यावी, अशी मागणी उपमहापौरांसह नगरसेवकांनी केली आहे. मात्र, या कामांचीही कागदपत्रे उपलब्ध नसल्याचे संबंधित अधिकारी यांनी सुनावणीदरम्यान सांगितले.