NCP Vs BJP : खंडाळ्यात गोरे-मकरंदआबांच्या कार्यकर्त्यांमध्ये राडा : ‘वोट चोर’ म्हटल्याने भाजपचे कार्यकर्ते अंगावर धावून गेले

Satara, 02 November : सातारा जिल्हा मध्यवर्ती सहकारी बॅंकेसाठी रविवारी शांततेत मतदान झाले. मात्र, खंडाळा मतदान केंद्रावर महायुतीमधील भारतीय जनता पक्ष आणि राष्ट्रवादी काँग्रेस पक्षाच्या कार्यकर्त्यांमध्ये राडा झाला. भाजपच्या कार्यकर्त्यांकडे पाहून ‘वोट चोर’ म्हटल्यामुळे ग्रामविकास मंत्री जयकुमार गोरे यांचे कार्यकर्ते आणि मदत व पुनर्वसन मंत्री मकरंद पाटील यांच्या कार्यकर्त्यांमध्ये शाब्दीक चकमक झाली. पोलिसांनी दोन्ही बाजूंच्या कार्यकर्त्यांना बाजूला नेल्याने पुढील गोष्टी टळल्या. पण खंडाळ्यातील राजकीय वातावरण चांगलेच तापले होते.

सातारा जिल्हा मध्यवर्ती सहकारी बॅंकेसाठी ९७. ९० टक्के मतदान झाले. कोरेगाव, खंडाळा आणि वाई या तीन मतदान केंद्रावर १०० टक्के मतदान झाले आहे. यातील खंडाळा मतदान केंद्रावर सोसायटी मतदारसंघाच्या मतदानादरम्यान भाजप आणि राष्ट्रवादी काँग्रेसच्या कार्यकर्त्यांमध्ये राडा झाला.

खंडाळा मतदारसंघात सोसायटी गटात ५०, तर इतर मतदारसंघासाठी ३८ असे एकूण ८८ मतदान होते. ते शंभर टक्के मतदान झाले. खंडाळ्यात प्रथमच राष्ट्रवादी काँग्रेसला भारतीय जनता पक्षाकडून कडवे आव्हान देण्यात आले आहे. त्यामुळे खंडाळ्याचे राजकीय वातावरण तापले आहे. त्याला जिल्हा परिषदेतील अध्यक्षपदाच्या निवडणुकीतील संघर्षाची किनारही होती.

राष्ट्रवादी काँग्रेसचे नेते तथा मंत्री मकरंद पाटील हे सकाळी साडेअकराच्या सुमारास आपल्या ३० मतदारांसह केंद्रावर पोचले. मतदान केल्यानंतर ते परत गेले. त्यानंतर पावणे दोनच्या सुमारास भाजपचे कार्यकर्ते मतदानासाठी केंद्रावर दाखले. ते सर्वजण मतदानासाठी जात होते, त्या वेळी काहींनी भाजप मतदारांच्या दिशेने बघून ‘वोट चोर’ अशी टिपण्णी केली.

‘वोट चोर’ या टिपण्णीमुळे भाजप कार्यकर्ते चांगलेच भडकले. कार्यकर्त्यांच्या भावना दुखावल्याने तेही राष्ट्रवादी काँग्रेसच्या कार्यकर्त्यांच्या दिशेने गेले. त्या वेळी दोन्ही गटांमध्ये जोरदार शाब्दीक चकमक झाली. शब्दाला शब्द वाढत गेल्यामुळे कार्यकर्ते एकमेकांच्या अंगावर धावून गेले. वातावरण काही वेळ तणावपूर्ण झाले होते. पण पोलिसांनी वेळीच हस्तक्षेप केल्यामुळे परिस्थिती नियंत्रणात आली आणि पुढील गोष्टी टळल्या.