Vijaykumar Deshmukh : डीपीसीच्या बैठकीला दांडी मारणाऱ्या देशमुखांची शिंदेसेनेच्या मंत्र्याच्या दौऱ्यात हजेरी

Solapur, 13 July : सोलापूर जिल्हा नियोजन समितीची बहुचर्चित बैठक पालकमंत्री जयकुमार गोरे यांच्या अध्यक्षतेखाली पार पडली. त्या सभेला जिल्ह्यातील बहुतांश आमदार आणि खासदार उपस्थित होते. मात्र, सत्ताधारी भारतीय जनता पक्षाचे वरिष्ठ आमदार विजयकुमार देशमुखांची अनुपस्थिती प्रकर्षाने जाणवली. नियोजन समितीच्या बैठकीला दांडी मारणाऱ्या देशमुखांनी शिवसेना नेते तथा उद्योगमंत्री उदय सामंत यांच्यासोबत एका खासगी कार्यक्रमाला हजेरी लावल्याचे पुढे येत आहे, त्यामुळे देशमुखांची नाराजी अजून गेली नाही का, अशी चर्चा राजकीय वर्तुळात रंगली आहे.

जिल्हा नियोजन समितीच्या बैठकीत आपापल्या मतदारसंघासाठी निधी खेचून नेण्याची स्पर्धा लागलेली असते. नेमके त्याच बैठकीकडे माजी मंत्री विजयकुमार देशमुख यांनी पाठ का फिरवली, असा सवाल उपस्थित होत आहे.

दोन्ही देशमुखांची पालकमंत्री जयकुमार गोरे यांच्यावरील नाराजी लपून राहिलेली नाही. असे असतानाही माजी सहकार मंत्री तथा दक्षिण सोलापूरचे आमदार सुभाष देशमुख यांनी बैठकीला हजेरी लावून आपल्या खास शैलीत बॅटिंग केली. विशेषतः आम्ही सांगितले की राग येतो, मुख्यमंत्र्यांपर्यंत बोलूनही प्रश्न मार्गी लागला नाही, अशी नाराजी बोलून दाखवली.

एकीकडे सुभाष देशमुख यांनी आपली नाराजी बाजूला ठेवन नियोजन समितीच्या बैठकीला हजेरी लावली. पण विजयकुमार देशमुख यांनी मात्र बैठकीकडे पाठ फिरविणे पसंत केले. ते शेवटपर्यंत जिल्हा नियोजन समितीच्या बैठकीकडे फिरकलेच नाहीत.

जिल्हा नियोजन समितीकडे पाठ फिरविणारे आमदार विजयकुमार देशमुख यांनी शिवसेनेचे उद्योग मंत्री उदय सामंत यांच्यासोबत एका कार्यक्रमात दिसून आले. शिंदेसेनेचे मंत्री आल्यानंतर देशमुख गटाचे नगरसेवक त्यांच्या स्वागताला हजर असतात, त्यामुळे आमदार देशमुख यांची डीपीसीतील अनुपस्थिती आणि होटगी मठात सामंत यांच्यासोबत लावलेली हजेरी याची चर्चा सोलापूर शहरात रंगली आहे.