Karad : उद्धव ठाकरेंनी आमदारांवर गैरविश्वास का दाखवला... शंभूराज देसाईंचा सवाल

कऱ्हाड : विधान परिषद मतदानावेळी आम्हा आमदारांना बोलावुन मतदान कोणाला करायचे हे सांगताना दरवेळीसारखे आमचे नेते एकनाथ शिंदे हे नव्हते, हे आम्हाला पटले नाही. त्यानंतर मतदानासाठी जाताना विधान परिषदेच्या आमदाराला आमच्यासोबत ठेवले होते. एवढा उद्धव ठाकरे यांनी आमदारांवर गैरविश्वास का दाखवला, असा सवाल करुन आम्ही ४० आमदारांनी एकनाथ शिंदे यांना निर्णय घ्यायला भाग पाडले, असे स्पष्टीकरण उत्पादन शुल्क मंत्री तथा पालकमंत्री शंभूराज देसाई यांनी दिले.

मंत्री देसाई यांची कॅबिनेट मंत्रीपदासह ठाणे आणि सातारा जिल्ह्याच्या पालकमंत्रीपदी निवड झाल्याबद्दल त्यांचा मुंबईकर रहिवासी मित्रमंडळातर्फे आयोजित सत्कार कार्यक्रमात ते बोलत होते. यावेळी बाळासाहेबांची शिवसेनेचे उपनेते विजय नाहटा, शिवसेनेचे जिल्हा प्रमुख विजय चौगुले, जयवंत शेलार, किशोर पाटकर, दमयंती आचरे, अशोक गावडे, आबासाहेब देसाई, प्रकाश देसाई, प्रदीप पाटील, चंद्रकांत चाळके, संतोष जाधव, जयवंत जाधव यांच्यासह कार्यकर्ते उपस्थित होते.

मंत्री देसाई म्हणाले, राज्यातील मोठा जिल्हा म्हणून परिचित असणारा ठाणे आणि स्वतःच्या सातारा जिल्ह्याचे पालकमंत्रीपद मुख्यमंत्री एकनाथ शिंदे यांनी मला दिले आहे. महाराष्ट्रातील मराठी माणसाला ताठ मानेने मुंबईत राहता आले पाहिजे, कुणाची लाचारी पत्करली नाही पाहिजे. ही भूमिका बाळासाहेब देसाई यांची होती.

तीच भूमिका शिवसेना प्रमुख बाळासाहेब ठाकरे यांची होती. शिवसेना उभी करण्यासाठी बाळासाहेब देसाईंनी मोठे सहकार्य केले. बाळासाहेब देसाईंचा नातू म्हणून शंभूराज देसाई हे लाल दिव्याच्या गाडीतुन फिरले पाहिजेत. यासाठी ठाकरे यांनी मला राज्य सहकार परिषदेचे अध्यक्षपद दिले. त्यांच्याशी आमची निष्ठा आहे.