सांगली जिल्ह्यातील तासगाव, कवठेमहांकाळ तालुक हे तसे राजकीय भूकंपाचे व तितक्याच चर्चेचे तालुके आहेत. राज्यस्तरावरील राजकारण वेगळे आणि तालुका स्तरावरील राजकारण वेगळे हे वेळोवेळी येथील लोकप्रतिनिधींनी दाखवून दिले आहे. विधानसभा निवडणुकीत माजी खासदार संजय पाटील यांनी राष्ट्रवादी काँग्रेस मधून निवडणूक लढवली असताना त्यांच्या विरोधात असणारे राष्ट्रवादी शरदचंद्र पवार पक्षाचे रोहित पाटील या दोघांच्या मनोमिलनाचे वारे व चर्चा सुरू झाल्याने जिल्ह्यात खळबळ उडाली आहे.
यापूर्वी देखील आर. आर. पाटील यांनी माजी खासदार संजय पाटील, अजित घोरपडे यांचे मनोमिलन झाले होते. त्याच धर्तीवर आता पुन्हा एकदा मनोमिलनाची चर्चा सुरू झाली आहे. जिल्हा परिषदेच्या निवडणुकीनंतरच याबाबतचे चित्र स्पष्ट होणार आहे.
जिल्ह्यातील जिल्हा परिषद, पंचायत समिती, नगरपालिका, नगरपरिषदा आणि महानगरपालिकेच्या निवडणुकींचे कोणत्याही क्षणी बिगुल वाचण्याची शक्यता आहे. अशा परिस्थितीत स्थानिक राजकीय पातळीवर जोरदार हालचाली सुरू आहेत. तर भाजप, शिवसेना, राष्ट्रवादी काँग्रेस हे महायुती तर काँग्रेस शिवसेना उद्धव बाळासाहेब ठाकरे राष्ट्रवादी शरदचंद्र पवार पक्ष हे महाविकास आघाडीमार्फत या निवडणुकांना सामोरे जाणार आहे.
असा परिस्थितीत लोकसभा निवडणुकीत भाजपमधून पराभव झालेले आणि विधानसभा निवडणुकीत हार पत्करावे लागलेले माजी खासदार संजय काका पाटील यांनी राष्ट्रवादीशी भाजपशी फारकत घेतली आहे. त्यामुळे स्थानिक स्वराज्य संस्थेच्या निवडणुकीत पाटील हे नेमकी काय भूमिका घेण्यात याकडे जिल्ह्याचे लक्ष लागून राहिले आहे.
आगामी स्थानिक स्वराज्य संस्थेच्या निवडणुकीत पुन्हा एकदा विकास आघाडीचा झेंडा हातात घेऊन त्यांनी महायुतीसह महाविकास आघाडीसोबत दोन हात करण्याची तयारी ठेवली आहे. सुरुवातीच्या टप्प्यात पाटील यांची भूमिका गुलदस्त्यात असली तरी निवडणुकीत माजी खासदार पाटील गटाची भूमिका काय असणार हे त्यावेळच्या परिस्थितीनुसार ठरणार आहे.पण त्यांची राजकीय भूमिका बदलल्यामुळे तासगाव- कवठेमहांकाळ मतदारसंघात राजकीय फटाके फुटणार याची चर्चा सुरू आहे.
माजी खासदार संजय पाटील यांनी आपली भूमिका जाहीर न केल्याने कार्यकर्ते संभ्रमावस्थेत आहेत. अशा परिस्थितीत आमदार रोहित पाटील यांच्यासोबत मनोमिलन करणार की त्यांच्या विरोधात लढणार याची देखील कार्यकर्त्यांमध्ये चर्चा सुरू आहे. यापूर्वीचा इतिहास पाहिला तर यापूर्वी दिवंगत नेते आर आर पाटील यांनी संजय पाटील यांच्याशी मनोमिलन केले होते. तोच इतिहास पुन्हा घडणार का? याची देखील उत्सुकता आता जिल्ह्यातील कार्यकर्त्यांना लागली आहे.
खासदार संजय पाटील यांनी राजकीय पक्षांपासून अलिप्त राहून 'विकास आघाडी'चा झेंडा हाती घेतल्याने राजकारणात नवीन घडामोडींना वेग आला आहे. मतदारसंघातील आमदार रोहित पाटील, संजय पाटील आणि अजितराव घोरपड़े या तिन्ही नेत्यांच्या परस्पर संबंधांकड़े सर्वाचे लक्ष लागले आहे. त्यामुळे आगामी काळात राजकीय 'हाय होल्टेज ड्रामा' यानिमित्ताने बघायला मिळणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.