Solapur Lok Sabha : ‘वंचित’च्या उमेदवाराची सोलापूरमधून माघार; भाजप-काँग्रेसमध्ये थेट लढत होणार

Solapur, 22 April : सोलापूर लोकसभा मतदारसंघातील वंचित बहुजन आघाडीचे उमेदवार राहुल गायकवाड यांनी निवडणुकीतून माघार घेतली आहे. यबाबतची घोषणा ते लवकरच करणार असून, आपली भूमिका ते माध्यमांसमोर मांडणार आहेत. गायकवाड यांनी लोकसभा निवडणुकीतून माघार घेतल्यामुळे आता सोलापूरमध्ये काँग्रेसच्या उमेदवार आमदार प्रणिती शिंदे आणि भाजपचे उमेदवार राम सातपुते यांच्यात थेट लढत होणार आहे.

वंचित बहुजन आघाडीचे (Vanchit Bahujan Aghadi) प्रमुख ॲड. प्रकाश आंबेडकर यांनी सोलापूर लोकसभा मतदारसंघातून (Solapur Lok Sabha Constituency) अक्कलकोटचे राहुल गायकवाड (Rahul Gaikwad) यांना उमेदवारी जाहीर केली होती. गायकवाड यांची उमेदवारी सोलापूरसाठीही नवखी होती. त्यावेळी त्यांच्या उमेदवारीची चर्चा झाली होती.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

राहुल गायकवाड यांचा उमेदवारी अर्ज छाननीत वैध ठरला होता. मात्र, त्यानंतर त्यांनी आज अर्ज माघारी घेण्याच्या शेवटच्या दिवशी सोलापूर लोकसभा मतदारसंघातून आपला उमेदवारी अर्ज मागे घेतला आहे. याबाबतची घोषणा ते लवकरच करणार आहेत. पत्रकार परिषद घेऊन ते आपली भूमिका मांडणार आहेत. वंचित बहुजन आघाडीचे गायकवाड यांच्याबरोबरच काही अपक्ष उमेदवारांनीही माघार घेतली आहे.

दरम्यान, राहुल गायकवाड यांच्या माघारीमुळे सोलापूर लोकसभा मतदारसंघात आता काँग्रेसच्या प्रणिती शिंदे आणि भाजपचे राम सातपुते यांच्यात थेट लढत होणार आहे. वंचितने उमेदवार मागे घेण्यापूर्वीच एमआयएमने सोलापूर लोकसभा मतदारसंघात उमेदवार न देण्याचा निर्णय घेतला होता. त्यामुळे सोलापुरात प्रणिती शिंदे आणि राम सातपुते यांच्यात लढत होणार हे आता निश्चित झाले आहे.

R