अजितदादा स्टॅम्पवर लिहून देतो म्हणाले, तरीही पंतप्रधानांनी विचारले "उद्धवजी सेशन में आऐंगे?"

दिल्ली : महाराष्ट्राचे मुख्यमंत्री उद्धव ठाकरे (Uddhav Thackeray) सध्या आजारपणातून बरे होत आहेत. त्यामुळे ते विधीमंडळाच्या हिवाळी अधिवेशनात उपस्थित राहणार की नाही यावर सध्या गल्ली पासून दिल्लीपर्यंत चर्चा सुरु आहे. अशातच काल अधिवेशनाच्या (Assembly Winter Session) पूर्वसंध्येला उपमुख्यमंत्री अजित पवार (Ajit Pawar) यांनी मुख्यमंत्र्यांच्या तब्येतीवर भाष्य केले. पत्रकारांनी त्यांना वारंवार मुख्यमंत्री अधिवेशनाला उपस्थित राहणार का, अशी विचारणा केली. त्यावर ते त्यांच्या सोयीने विधीमंडळ कामकाजात सहभागी होणार आहेत, असे अजित पवारांनी स्पष्ट केले.

मात्र या स्पष्टतेनंतरही वेगवेगळ्या मार्गांनी त्याच आशयाचे प्रश्न येत राहिले, अखेरीस वैतागून अजित पवार यांनी मुख्यमंत्री अधिवेशनाला येणार आहेत, हे आता स्टॅम्प पेपरवर लिहून देऊ का, असा प्रतिसवाल पत्रकारांना केला. त्यावर एकच हशा पिकला. त्यामुळे उद्धव ठाकरे हे आता त्यांच्या सोयीने अधिवेशनात येणार आहेत हे तर स्पष्ट आहे. पण आज पंतप्रधान नरेंद्र मोदी (Narendra Modi) यांनीही अजित पवारांच्या याच वक्तव्याचा धागा पकडत शिवसेना खासदारांकडे उद्धव ठाकरेंच्या तब्येतीबद्दल आणि अधिवेशनातील उपस्थितीबद्दल विचारपूस केली.

पंतप्रधान मोदी यांनी खासदार विनायक राऊत (Vinayak Raut) आणि खासदार गजानन किर्तीकर (Gajanan Kirtikar) यांच्याकडे उद्धव ठाकरेंच्या तब्येतीची विचारपूस केली. ते म्हणाले, “विनायकजी, कैसी है उद्धवजी की तबियत...?" आज सेशन में जाऐंगे क्या? अजित पवार का बयान सुना, बोल रहे थे की उद्धवजी सेशन में आऐंगे. त्यावर विनायक राऊत यांनी अगदी सकारात्मक उत्तर देत मुख्यमंत्र्यांची तब्येत उत्मत असल्याचे सांगितले. मात्र अजितदादांच्या उद्धव ठाकरे अधिवेशनात येणार आहेत हे वक्तव्य पंतप्रधानांपर्यंत पोहचले हे नक्की.

दरम्यान आज अधिवेशनाचा पहिलाच दिवस भरती प्रक्रियेतील मुद्दे, पेपर फूटी, छत्रपती शिवाजी महाराजांच्या पुतळ्याची विटंबना, मोदींच्या नकलेचा मुद्दा, १२ आमदारांचे निलंबन, विजबील अशा विविध मुद्द्यावर गाजला. यावर नाना पटोले, नितीन राऊत, भास्कर जाधव, एकनाथ शिंदे, राजेश टोपे यांनी जोरदार बॅटिंग केली.