Prakash Ambedkar : '15 दिवसांत देशाच्या राजकारणात भूकंप, शरद पवार भाजपशिवाय राहू शकत नाही', प्रकाश आंबेडकरांचा खळबळजनक दावा

Prakash Ambedkar VS Sharad Pawar : राष्ट्रवादी काँँग्रेस शरदचंद्र पवार पक्षाचे अध्यक्ष शरद पवार हे भाजपचे हस्तक आहेत. ते भाजपशिवाय राहू शकत नाही. ते त्यांना सोडून कधीही बाहेर पडू शकत नाही. 15 दिवस थांबा मोठी बातमी मिळेल, असा खळबळजनक दावा वंचि बहुज आघाडीचे प्रमुख प्रकाश आंबेडकर यांनी केला आहे.

प्रकाश आंबेडकर हे पंढरपूर येथे एका न्यायालयात प्रकरणासाठी हजर राहण्यासाठी आले होते त्यावेळी त्यांनी पत्रकारांशी संवाद साधताना शरद पवार यांच्याविषयी वादग्रस्त वक्तव्य करत म्हटले की, शरद पवार हे जरी देशाच्या राजकारणात दिसत असले तरी ते भाजपचे हस्तक आहेत.

आंबेडकर यांनी केलेल्या दाव्यानंतर राष्ट्रवादी काँग्रेश शरदचंद्र पवार पक्षाच्या नेत्यांकडून चोख प्रत्युत्तर देण्यात आले आहे. प्रदेशाध्यक्ष शशिकांत शिंदे यांनी म्हटले आहे की, आमच्या पक्षावर बोलण्यापेक्षा प्रकाश आंबेडकरांनी स्वतःच्या पक्षाबाबात निर्णय घ्यावा. विधानसभा निवडणुकीच्या वेळी प्रकाश आंबेडकर यांनी महाविकास आघाडीत यावे यासाठी प्रामाणिक प्रयत्न महाविकास आघाडीच्या माध्यमातून केला गेला. अवास्तव जागांच्या मागण्या केल्या गेल्या. जाणीवपूर्वक त्या केल्या गेल्या का आणि तसं केलं गेलं असेल तर हस्तक कोण असा प्रश्न आम्हाला पडलाय.

रोहित पवारांचा पलटवार

रोहित पवार यांनी देखील प्रकाश आंबेडकरांच्या दाव्यावर बोलताना म्हटले आहे की,जिथे जिथे वंचितचे उमेदवार उभे आहेत तेथे प्रत्यक्ष आणि अप्रत्यक्ष फायदा हा भाजपला झाला आहे. तर्कवितर्क सोडा आकडेवारी जर पाहिली तर लोकसभा आणि विधानसभेला जिथे जिथे वंचितचा उमेदवार उभा आहे तेथे तेथे भाजपचा उमेदवार निवडून आला आहे.

सुप्रिया सुळेंनी घेतली PM मोदींची भेट

खासदार सुप्रिया सुळे यांनी काल अचानक पंतप्रधान नरेंद्र मोदी यांची भेट घेतली. सुळे यांच्या या भेटीने अनेकांच्या भुवया उंचावल्या. मात्र ही राजकीय भेट नसल्याचे पुढे आले. राष्ट्रीय हातमाग दिनानिमित्त महाराष्ट्राच्या कुशल विणकरांनी बनवलेली खास पैठणी सुळे यांनी पंतप्रधान मोदींना भेट दिली. तसेच भेटीसाठी वेळ दिल्याबद्दल पंतप्रधानांचे आभार मानले.