Sunetra Pawar: सुनेत्रा पवारांच्या शपथविधीची लगबग... पण शिवसेना आमदारांच्या मनात वेगळचं काहीतरी; भाजप-राष्ट्रवादीवर जाहीर नाराजी

Sunetra Pawar: राज्याचे उपमुख्यमंत्री दिवंगत अजित पवार यांच्या निधनानंतर त्यांच्या पत्नी सुनेत्रा पवार या काहीवेळातच उपमुख्यमंत्रीपदाची शपथ घेणार आहेत. पण दुसरीकडं एकनाथ शिंदेंच्या शिवसेनेच्या आमदारांचं काहीतरी वेगळचं सुरु आहे. या आमदारांना ही गोष्ट पटत नसल्याचं दिसतंय. कारण या शपथविधीबाबत त्यांनी जाहीर नाराजी व्यक्त केली आहे. त्यामुळं आता वेगळीच चर्चा सुरु झाली आहे.

शिवसेनेचे मंत्री संजय शिरसाट आणि आमदार संजय गायकवाड यांनी सुनेत्रा पवार यांच्या शपथविधीबाबत नाराजी व्यक्त केली आहे. राजकारणात, सार्वजनिक जीवनात खुर्ची जिंकली माणूस हरला, अशा शब्दांत शिरसाट यांनी नाराजी व्यक्त केली आहे. सध्या शपथविधीच्या ज्या काही घडामोडी घडत आहेत या निश्चित काही कालावधी गेल्यानंतर होणं साहजिक होतं. परंतु इतक्या तातडीच्या हालचाली होणे धक्कादायक आहे. काल राख सावडण्याचा कार्यक्रम झाल्याबरोबर सुनेत्रा वहिनी मुंबईकडे जाणे इतर राजकीय नेत्यांनी स्टेटमेंट देणे हे थोडंसं मनाला पटत नाही. परंतू हे राजकारण आहे, त्यांच्या पक्षाने घेतलेला निर्णय आहे. तो का घेतला, कोणत्या परिस्थितीत आणि का घ्यावा लागला? हे सगळ जरी प्रश्नचिन्ह निर्माण करणारं असलं तरी अखेर हा निर्णय झालेला आहे, असं शिरसाट यांनी म्हटलं आहे.

तर दुसरीकडं शिवसेनेचे बुलढाण्याचे आमदार संजय गायकवाड यांनी म्हटलं की, अजितदादांची राखही अद्याप शांत झाली नाही, मात्र इतक्या लवकर या घडामोडी होतील असं वाटलं नाही. हा पवार कुटुंबियांचा एकत्रित निर्णय असेल, गेल्या काही दिवसांपासून बघितलं तर दादांचीही मानसिकता हीच होती की, दोन्ही पक्षांनी एकत्र येऊन निर्णय घ्यावे. दोन्ही कुटुंबांनी मिळून हा निर्णय घ्यायचा आहे. त्यांच्या मागे भीष्मपितामह म्हणून शरद पवार साहेब उभे आहेत. त्याचबरोबर अजित पवारांच्या निधनामागे कुठलाही घातपात दिसत नाही तर हा केवळ अपघात आहे, असंही संजय गायकवाड यांनी पुढे म्हटलं आहे.