PM Politics : 19 डिसेंबरला राजकीय भूकंप, मराठी माणूस पंतप्रधान होणार; माजी मुख्यमंत्री पृथ्वीराज चव्हाण यांचा दावा

Prithviraj Chavan News : दिल्लीच्या राजकारण मोठा भूकंप होणार असून आत्ताचे पंतप्रधान बाजुला होतील आणि मराठी माणूस पंतप्रधान होईल, असा दावा माजी मुख्यमंत्री पृथ्वीराज चव्हाण यांनी केला होता. ते म्हणाले होते की महिनाभरात हा बदल होईल. मात्र, पिंपरी-चिंचवडमध्ये झालेल्या कार्यक्रमात त्यांनी थेट तारीख सांगत 19 डिसेंबरला मराठी माणूस पंतप्रधान होईल, असे सांगितले.

ते म्हणाले, नवीन पंतप्रधान हा काँग्रेस नसणार आहे. काँग्रेस आणि विरोधी पक्षांकडे तेवढे संख्याबळ नाही. त्यामुळे भाजपमधीलच नवीन चेहरा पंतप्रधान होईल. आणि कदाचित मराठी माणूस पंतप्रधान होण्याची शक्यता आहे.

चव्हाण यांनी मराठी माणूस पंतप्रधान होईल, असे म्हटले मात्र कोणता मराठी नेता पंतप्रधान होईल, याबाबत बोलण्याचे टाळले. त्यामुळे नितीन गडकीर यांच्याकडे चव्हाण हे अंगुलीनिर्देश करत असल्याची देखील चर्चा आहे.

अमेरिकन संसद जेव्हा एपस्टाईन फाइल्सची माहिती जाहीर करेल तेव्हा त्याचे भारतीय राजकारणावर काय परिणाम होतील ? असे सूचक ट्विट देखील त्यांनी केले होते. या ट्विट त्यांनी केंद्रीय मंत्री नितीन गडकरी आणि मुख्यमंत्री देवेंद्र फडणवीस यांना टॅग केले होते.

एपस्टाईन फाइल्स प्रकरण काय?

अमेरिकेतील उद्योगपतीने अनेक बेकायदेशीर गोष्टी करत अनेक राजकीय लोकांना त्यात गुंतवले आहे. त्यामध्ये अनेक देशातील मोठ्या लोकांची नावे आहेत. त्यामध्ये आपल्या देशातील नेत्यांची नावे आहेत का हे पहावे लागेल. या ‘एपस्टाईन फाईल्स’ प्रकरणाचा भारतीय राजकारणावर परिणाम होऊ शकतो, असा दावा चव्हाण यांनी केला होता. फाईल अमेरिकेच्या संसदेने ताब्यात घेतली आहे. ती फाईल खुली करण्याची मागणी केली जात आहे.