Rahuri by election : राहुरी पोटनिवडणुकीत मोठा ट्विस्ट; बिनविरोधची आशा मावळली ! शशिकांत शिंदेंनी स्पष्टच सांगितले, 'होणारच...'

Mumbai News : बारामती, राहुरी विधानसभा पोटनिवडणुकीसाठी उमेदवारी अर्ज मागे घेण्याचा गुरुवारी शेवटचा दिवस आहे. त्यामुळे राज्यातील वातावरण चांगलेच तापले आहे. ही निवडणूक बिनविरोध होणार असल्याची चर्चा रंगली असतानाच आता या पोटनिवडणुकीबाबत राष्ट्रवादी काँग्रेस शरद पवार पक्षाचे प्रदेशाध्यक्ष शशिकांत शिंदे यांनी पक्षाची भूमिका स्पष्ट केली आहे. यावेळी त्यांनी प्रसार माध्यमाशी संवाद साधत असताना राहुरी येथील पॊटनिवडणुकीबाबत मोठे विधान केले आहे.

शशिकांत शिंदे (Shashikant Shinde) म्हणाले,' बारामती पोटनिवडणुकीसाठी आमच्या पक्षाने न लढविण्याची भूमिका स्पष्ट केली आहे. त्यामुळे आम्ही याठिकाणी उमेदवार दिलेला नाही. त्याशिवाय याठिकाणी काँग्रेसचा उमेदवार असला तरी आम्ही आमच्या निर्णयावर ठाम असल्याचे त्यांनी सांगितले. त्याशिवाय राहुरीची पोटनिवडणूक होणारच असल्याचे त्यांनी सांगत या ठिकाणी महाविकास आघाडीचे उमेदवार गोविंदराव मोकाटे यांची उमेदवारी कायम राहणार असल्याचे त्यांनी स्पष्ट केले.

राहुरी पोटनिवडणुकीबाबत शशिकांत शिंदे यांनी सर्व संभ्रम दूर केला आहे. महाविकास आघाडीचे (MVA) उमेदवार म्हणून गोविंदराव मोकाटे यांची उमेदवारी कायम राहील, हे सांगून त्यांनी कार्यकर्त्यांना कामाला लागण्याचे आदेश दिले आहेत. त्यामुळे आता महाविकास आघाडीतील सर्वच घटक पक्ष आता कामाला लागले आहेत.

दरम्यान, बारामती विधानसभा पोटनिवडणुकीतून माघार घेण्याचे संकेत आज काँग्रेसचे नेते विजय वडेट्टीवार यांनी दिले आहेत. माघार घेण्याबाबत एकमत झाले असून दिल्लीत पक्षश्रेष्ठी अंतिम निर्णय घेतील, असे वडेट्टीवार यांनी स्पष्ट केले. काँग्रेसचे उमेदवार आकाश मोरे यांनी मात्र अद्याप आपल्याला याबाबत निरोप नसल्याचे सांगितले आहे. प्रदेशाध्यक्ष हर्षवर्धन सपकाळ हे निर्णय सांगतील, असे त्यांनी सांगितले.

दरम्यान, बारामती पोटनिवडणुकीतून काँग्रेसने माघार घ्यावी, यासाठी राष्ट्रवादी काँग्रेसकडून जोरदार प्रयत्न केले जात आहेत. राष्ट्रवादीचे काही नेते हर्षवर्धन सपकाळ यांना भेटले असून माघार घेण्याची विनंती करण्यात आली आहे. या भेटीवेळी आमदार मकरंद पाटील, संजय खोडके, सना मलिक उपथित होते. त्यांनी बारामती पोटनिवडणुक बिनविरोध करण्याची मागणी केली आहे.