Raj Thackeray On Kundmala Bridge : कुंडमळा दुर्घटनेनंतर राज ठाकरे सरकारवर बरसले, 'निष्काळजी...'

Raj Thackeray News : कुंडमळा पूल दुर्घटनेत चार पर्यटकांना आपला जीव गमवावा लागला तर 51 पर्यटक जखमी आहेत. या घटनेनंतर मनसे प्रमुख राज ठाकरे यांनी सरकारला टार्गेट केले आहे. राज ठाकरे म्हणाले, 'हा पूल धोकादायक होता तर तिथे पूर्ण प्रवेशबंदी का नाही झाली हा प्रश्न आहेच. जर पूल धोकादायक झाला होता तर तो पाडून नव्याने पूल का नाही झाला ?'

'प्रत्येक घटनेच्या नंतर सरकारमध्ये बसलेल्यांची एक ठराविक प्रतिक्रिया येते की, 'बचावकार्य वेगाने सुरु आहे आणि सरकार बाधित नागरिकांच्या पाठीशी खंबीर उभं आहे...'पण मुळात हा प्रसंग का येतो ? सरकारचे इतके विभाग आहेत, ते नक्की काय करतात? त्यांनी दर काही महिन्यांनी किंवा या घटनेपुरतं बोलायचं झालं तर पावसाळयाच्या आधी धोकादायक पूल कुठले आहेत, त्याची तपासणी, त्याची एकतर दुरुस्ती किंवा ते बंद करणे असं काही नियोजन करता येत नाही ?', असा प्रश्नांचा भडिमार राज ठाकरे यांनी सरकारवर आपल्या ट्विटरवरून केला आहे.

'इतकी वर्ष सत्तेत असलेल्यांना याचं नियोजन करून प्रशासनाकडून कामं करून का घेता येत नाहीत ? आणि जर येत नसतील तर मग तुमच्या सत्तेचा अनुभव नक्की कुठला आणि त्याचा तुम्हाला असेल उपयोग पण राज्याला काय उपयोग ?', असा टोलाही राज ठाकरेंनी लगावला आहे.

'लोकांनी देखील उत्साहाला थोडा आवर घालायला हवा. अशा धोकादायक ठिकाणी जाताना, आपल्या कुटुंबाला घेऊन जाताना थोडं भान ठेवायला हवं. अर्थात म्हणून सरकारची जबाबदारी कमी होते असं नाही. पण सरकार जर निष्काळजीपणा दाखवणार असेल तर आपणच सतर्क रहायला हवं.', असा सल्ला देखील त्यांनी दिला आहे.

सरकारकडून पाच लाखांची मदत

पूल कोसळून चार जणांचा मृत्यू झाला आहे. मृतांच्या कुटुंबीयांना प्रत्येक पाच लाखांची मदत जाहीर सरकारने जाहीर केली आहे. मंत्री गिरीश महाजन यांनी स्पष्ट केले की पूल धोकादायक असल्याचे फलक लावले होते. मात्र, पर्यटकांनी त्या फलकाकडे दुर्लक्ष केले.