Raj-Uddhav Thackeray Alliance : ठाकरे बंधू एकत्र आले तर महाविकास आघाडीचे काय होणार? उद्धव ठाकरेंनी एक घाव दोन तुकडे केलेच

Uddhav Thackeray Politics : आगामी स्थानिक स्वराज संस्थांच्या निवडणुकीत राज ठाकरे-उद्धव ठाकरे एकत्र येण्याच्या चर्चा आहेत. मुंबई महापालिकेत दोन्ही ठाकरे बंधू एकत्र येतील अशी शक्यता वर्तवली जात असताना ठाकरे बंधूंची युती ही फक्त मुंबई पुरती नव्हे तर महाराष्ट्रभर असणार असे सांगितले जात आहे. त्यामुळे जर उद्धव ठाकरे राज यांच्यासोबत गेले तर महाविकास आघाडीचे काय होणार? असा प्रश्न उपस्थित केला जात आहे. त्यावर स्वतः उद्धव ठाकरेंनीच उत्तर दिले.

उद्धव ठाकरे यांची मुलाखत संजय राऊत यांनी घेतली. ठाकरे बंधू एकत्र येण्याची चर्चा होत असताना महाविकास आघाडीचे काय होणार? स्थानिक स्वराज संस्थेच्या, महापालिका निवडणुका कशा लढणार असा प्रश्न राऊत यांनी केला. त्यावर ठाकरे म्हणाले, 'हा ज्याचा त्याचा प्रश्न आहे. मध्यंतरी काँग्रेसशी बोलणं झालं तर ते म्हणाले हा विषय ते स्थानिक पातळीवर सोडतील. तसं असेल तर तसं करू. कोणाला अडचण होणार आहे.'

उद्धव ठाकरेंनी दिलेल्या उत्तरामुळे राज्यपातळीवर महाविकास आघाडी म्हणून लढण्यापेक्षा स्थानिक पातळीवरील समीकरणे लक्षात घेत स्थानिक पातळीवर आघाडी करायची की नाही याबाबत तेथील कार्यकर्त्यांच्या इच्छेनुसार निर्णय घेतला जाणार असल्याचे ठाकरेंनी संकेत दिले आहेत.

राज ठाकरेंसोबत युती होणार?

राज ठाकरेंसोबत युती होणार की नाही याचे स्पष्ट उत्तर उद्धव ठाकरेंनी दिले नाही. मात्र, राऊतांच्या एका प्रश्नाला उत्तर देताना ते म्हटले की, आम्ही दोघे एकत्र येणार असू तर कोणाला काही प्रोब्लेम? आणि जर कोणाला प्रोब्लेम असेल तर आम्ही त्याचा विचार का करावा? मी राज थेट चर्चा करतो. मी त्याला आत्ताही फोन करू शकतो तो मला करू शकतो. आम्ही भेटलो तर उघडपणे भेटतो. चोरूनमारून नाही, असे देखील उद्धव ठाकरे म्हणाले.