Madhubhai Kulkarni Death: संघाचा झुंजार प्रचारक हरपला, मधुभाई कुलकर्णींचं निधन; मोदींना राजकारणात आणण्यात मोलाची भूमिका

Chhatrapati Sambhajinagar News: राष्ट्रीय स्वयंसेवक संघाचे ज्येष्ठ प्रचारक मधुभाई कुलकर्णी यांचं गुरुवारी(ता.18) दुपारी साडेबारा वाजता निधन झालं आहे. त्यांनी 88 व्या वर्षी अखेरचा श्वास घेतला होता. पंतप्रधान नरेंद्र मोदी (Narendra Modi) यांना राजकारणात आणण्यात त्यांचा महत्त्वाचा योगदान राहिलं होतं.

मधुभाई कुलकर्णी यांचा जन्म 17 मे 1938 रोजी झाला होता. त्यांना लहानपणापासूनच राष्ट्रीय स्वयंसेवक संघाच्या शाखेत जाण्याची ओढ लागली. कुलकर्णी यांनी राष्ट्रीय स्वयंसेवक संघाच्या वाटचालीतील अनेक चढउतार पाहिले. त्यांचं पार्थिव अंत्यदर्शनासाठी संघाच्या समर्पण कार्यालयात ठेवण्यात आलं आहे. आत्तापर्यंत भय्याजी जोशी, बहुजन कल्याण मंत्री अतुल सावे यांनी पार्थिवाचं अंत्यदर्शन घेतलं आहे.

राष्ट्रीय स्वयंसेवक संघाचे(RSS) ज्येष्ठ प्रचारक मधूभाई कुलकर्णीं यांचं पंतप्रधान नरेंद्र मोदींना राजकारणात पाठवण्यात महत्त्वाची भूमिका निभावली होती. त्यांना गुजरातमध्ये प्रांतप्रचारक म्हणून 1985 मध्ये पाठवण्यात आल्यानंतर त्यांनी संघ प्रचारक असलेले नरेंद्र मोदींना भाजपमध्ये पाठवलं होतं. यानंतर नरेंद्र मोदी सर्वाधिकवेळा गुजरातचे मुख्यमंत्री राहिले. 2014 च्या निवडणुकीत देशात सत्तापरिवर्तन घडलं.यात मोदींना पंतप्रधानपदाची तिसऱ्यांदा जबाबदारी स्वीकारली आहे.

बेळगाव जिल्ह्यातील चिकोडी येथे जन्मलेल्या मधुभाई यांनी राष्ट्रीय स्वयंसेवक संघाकडून सोपवण्यात आलेल्या विभाग, प्रांत, क्षेत्रीय प्रचारक यांसारख्या विविध जबाबदाऱ्या समर्थपणे सांभाळल्या. त्यांचं वास्तव्य काही वर्षांपासून छत्रपती संभाजीनगर येथे होते. त्यांनी मृत्यूनंतर देहदान केले आहे. त्यांचे पार्थिव रामचंद्र इन्स्टिट्यूट ऑफ मेडिकल सायन्सेस आर. के. दमाणी वैद्यकीय महाविद्यालयास सायंकाळी सोपवण्यात येणार आहे.